VIQUEQUE, 03 juñu 2024 (TATOLI)- Autoridade munisípiu Viqueque hamutuk ho Servisu Edukasaun munisípiu Viqueque , segunda ne’e, lansa programa merenda eskolár nivél munisípiu Viqueque iha Ensinu Báziku Centrál (EBC, sigla portugés), suku Caraubalu, Postu Viqueque Vila.
Iha serimónia lansamentu merenda eskolár ne’e, Prezidente Autoridade Munisípiu (PAM) Viqueque, Francisco C.S de Gonzaga Soares, husu, implementador programa merenda eskolár sira iha munisípiu Viqueque atu garante ai-han kualidade liuliu moos no ijiéne atu estudante sira konsumu ho dignu.
“Ohin ita lansa ona ita-nia programa merenda eskolár iha nivél munisípiu. Maske ita paradu fula hirak nian laran tanba liga ho orsamentu, maibé ohin ita bele hahú fila-fali ida-ne’e. Tanba ne’e ha’u husu ba ekipa jestaun program merenda eskolár no profesór sira kada eskola sira-ne’e atu implementa programa ida-ne’e atu garante kualidade ai-han ba ita-nia estudante sira”, Francisco C.S de Gonzaga Soares, hateten iha serimónia lansamentu programa merenda eskolár.
Tanba, Autoridade ne’e dehan estudante sira iha direitu tomak atu asesu ba programa merenda eskolár ho kualidade hodibele garante saude no motiva estudante sira simu matéria sira-ne’ebé profesór sira prepapra.
Kona-ba problema dapur siraa, nia dehan, kondisaun dapur ne’ebé kada eskola sira iha ladun di’ak ne’e sei aprezenta ba Ministériu Edukasaun atu tinan oin bele tau ba perioridade.
Iha fatin hanesan, Diretór EBC Kabira-oan, José Sarmento Batista, komrpomete EBC Kabira-oan sei garante kualidade implementasaun programa merenda eskolár, maske kondisaun dapur ladun di’ak, maibé eskola sei kontralo ho di’ak ba kualidade ai-han.
“Programa ne’ebé ami hasoru maka produtu lokál menus liuliu foos rai menus, maibé ami sei esforsu hodi priense. Liga ba kondisaun fatin tein ladun di’ak, mas ami nafatin esforsu hodi fornese hahan ne’ebé moos ba ita-nia oan sira”, nia akresenta.
Estudante EBC Kabira-Oan ne’ebé sai benifísiariu ba programa merenda eskolár hamutuk na’in-531.
Kada estudante hetan sentavu 0,42
Programa merenda eskolár ne’ebé implementa iha munisipiu Viqueque ho duransaun efetivu loron 135, iha implementasaun ne’e estudante ida sei benifisia sentavu 0,42 .
Tuir dadús estudante benifisiáriu ba programa merenda eskolár ho totál 22,028, kompostu hosi Ensinu Baziku Sentral (EBC, sigla portugés) 19,711, Ensinu Baziku Filial na’in-2,307, Hosi eskola EBC total hamutuk 18 no EBF total hamutuk 77 husi dadús ne’e inklui mós eskola katólika ne’ebé eziste iha munisipiu Viqueque.
Enkuantu, programa merenda eskolar ne’e Autoridade munisipiu Viqueque aloka orsamentu totál hamutuk $1,7248,420 ne’ebé aloka ba EBC $1,117613 no aloka ba EBF $130,807.
Notisia relevante: Komisaun G iha PN husu hadi´a implementasaun merenda eskolár
Jornalista : Vitorino Lopes da Costa
Editór : Florêncio Miranda Ximenes
