COVALIMA, 03 Juñu 2024 (TATOLI) – Komandu Polísia Nasionál Timor-Leste (PNTL) Covalima, liuhusi seksaun investigasaun no seksaun tránzitu detein sidadaun indonéziu na’in-12 iha postu Tilomar no Suai, tanba uza vistu turista hodi halo atividade negósiu.
Komandante PNTL Covalima, Superintendente Polísia Calisto Gonzaga, informa katak PNTL detein sidadaun sira ne’e bainhira aluga abitante sira-nia motorizada hodi halo movimentu fa’an asesória imitasaun sira iha munisípiu ne’e.
“Ha’u simu informasaun husi komunidade katak sidadaun Indonézia lubuk ida mak movimentu iha Salele-Tilomar hodi halo negósiu fa’an asesória imitasaun ho vistu turista. Hafoin simu informasaun, ha’u orienta kedan tránzitu halo pasa-revista hodi buka tuir no ita konsege kaptura”, Calisto Gonzaga relata iha Santa Rosa, ohin.
Sidadaun estranjeiru na’in-12 ne’e balun ka’er iha Salele, balun iha Suku Beco, postu Suai, ne’ebé daudaun ne’e polísia halo hela identifikasaun no asegura hela iha komandu. Bazeia ba investigasaun, sidadaun sira ne’e orijen husi Sumatra-Indonézia.
Daudaun ne’e komandu asegura ona sira na’in-12 nia pasta no motorizada ne’ebé sira uza hodi hein prosesu ne’ebé komandu submete ba Ministériu Públiku, bainhira iha ona solusaun hafoin bele entrega fali ba polísia imigrasaun iha fronteira.
Sidadaun sira ne’e mai iha Timor-Leste liuhusi ftronteira Mota-Ain, iha munisípiu Bobonaro, iha loron 25 Maiu, no komandu PNTL Covalima ka’er iha loron 03 Juñu. Sira ne’e ho naran inisiál R, A, A, J, SY, AS, AR, Y, S, EF, HY no Y.
Jornalista: Celestina Teles
Editoras: Maria Auxiliadora
