HEADLINE, MUNISÍPIU, OÉ-CUSSE (RAEOA), POLÍTIKA

RAEOA hasa’e Bandeira Nasionál atu hametin espíritu patriotizmu no nasionalizmu

RAEOA hasa’e Bandeira Nasionál atu hametin espíritu patriotizmu no nasionalizmu

Prezidente Autoridade RAEOA, Rogério Tiago Lobato, hala'o pasa-revista iha serimónia ichar Bandeira Nasionál ne’ebé realiza iha kampu futebol Oébau. Imajen Tatoli/Abílio Elo Nini.

OÉ-CUSSE, 03 juñu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Rogério Tiago Lobato, kada fulan realiza hasa’e Bandeira Repúblika Demokrátika Timor-Leste (RDTL), atu hametin patriotizmu no nasionalizmu ba foinsa’e sira hodi fó onra ba eroi sira-nia mate iha prosesu funu libertasaun nasionál.

“Objetivu husi programa ne’e atu hametin patriotizmu ita-nia komunidade nian liuliu ba foinsa’e sira, ne’ebé sira moris ikus, sira nunka akompaña funu ne’e, entaun liuhusi ichar Bandeira kada fulan joven sira bele hatene istória luta to’o ukun rasik-aan ne’e,” Prezidente Autoridade RAEOA, Rogério Tiago Lobato, ko’alia iha ámbitu serimónia hala’o iha kampu futébol Oébau, segunda ne’e.

Eis gerileiru ne’e, hateten, funu 24 ema rihun mak mate hodi sosa bandeira RDTL ne’e, la’ós ema oferese mai bandeza, maibé tenke hada’u liuhusi prosesu naruk durante tinan 24 no ema mate barak maibé to’o ikus povu Timor-Leste manán funu ne’e.

Iha biban ne’e, Komandante PNTL Rejiaun Oé­-Cusse, Superintendente Polísia Nicolau Francelino da Costa, agradese tanba tinan barak komemorasaun ne’e iichar bandeira iha Oé-Cusse, ladún realiza.

“Tanba ne’e ita agradese ho prezensa autoridade foun ne’e ita realiza ichar bandeira iha semana dahuluk kada fulan nian, entaun ita koordena ho Autoridade RAEOA kada fulan tenke selebra atu relembra fali ita-nia mártir da pátria, ita-nia funu na’in-sira durante ne’e lakon sira-nia vida, ita fó netik onra ba sira, nune’e hanoin nafatin istória luta ba rai ida-ne’e,” nia katak.

Notísia relevante:Autoridade RAEOA sei estebelese tán postu saúde ida iha aldeia Mahata

Entretantu, hola parte iha seremónia ichar bandeira ne’e mai husi xefe suku sira, membru Autoridade RAEOA, Ezekutivu ZEEDOA ho estrutura, PNTL no F-FDTL, funsionáriu estudante no profesór sira.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!