iklan

COVALIMA, HEADLINE

BTL Covalima kontinua mellora sistema hodi distribui bee ba komunidade

BTL Covalima kontinua mellora sistema hodi distribui bee ba komunidade

Tékniku Bee Timor-Leste, Empreza Públiku *BTL, E.P) Covalima instala ona kontadór ba kliente sira iha área urbana. Imajen/Espesiál.

COVALIMA, 04 Juñu 2024 (TATOLI) – Bee Timor-Leste, Empreza Públika (BTL, E.P) nafatin mellora abastesimentu bee hodi distribui bee-moos ba komunidade iha área urbana iha munisípiu Covalima.

Koordenadór BTL Covalima, Castro Dody Ramos, dehan BTL presiza atende kliente sira liuhusi servisu rotina hodi identifika kanu ku’ak, monta kontadór, atende kliente sira ne’ebé hato’o keixa no hadi’a kanalizasaun bee hodi garante bee ba populasaun sira iha área urbana.

“Ho atividade ne’ebé BTL, E.P hala’o entre Janeiru no Marsu arrekada ona reseita $7.580,90 no iha Abríl no Maiu hamutuk $7.484,70 ba kofre Estadu, la inklui reseita Juñu 2024”, Castro Dody Ramos informa ba Tatoli.

Reseita ne’e kontribui husi kliente 1.262, husi númeru ne’e kliente kuaze porsentu 95 ka 1.200 mak iha ona konxiénsia hodi selu tuir kontadór ne’ebé BTL instala ona no kliente ho porsentu 4 ka 62 iha área urbana mak la selu.

Tuir dadus ne’ebé rejista iha sistema BTL Covalima, kliente iha área urbana hamutuk 1.256 husi totál populasun 11.626.

Iha trimestre dahuluk, BTL Covalima halo produsaun bee-moos 94.888m3, ne’ebé kada fulan prodús bee 31.629 m3, husi ne’e kada loron distribui bee-moos 1.500m3. Iha trimestre daruak, kliente aumenta ba 1.262 husi totál populasaun 11.673.

Kliente Mário Amaral kontente ho serbisu ekipa téknika Bee Timor-Leste, tanba bele rezolve ona komunidade nia halerik atu asesu ba bee-moos, maske seidauk asesu ho porsentu 100.

Notísia relevante: BTL Covalima arrekada reseita $24.270

Jornalista: Celestina Teles

Editóra: Maria Auxiliadora

iklan
iklan

Leave a Reply

iklan
error: Content is protected !!