iklan

HEADLINE, KAPITÁL

DNIK tinan ne’e kontinua dezenvolve infraestrutura rede iha postu administrativu sira

DNIK tinan ne’e kontinua dezenvolve infraestrutura rede iha postu administrativu sira

Diretór Diresaun Nasionál Infraestrutura no Komunikasaun (DNIK) MTK, Ambrosio M.B. Amaral. Imajen Tatoli/Egas Cristóvão

DILI, 04 juñu 2024 (TATOLI)—Ministériu Transporte no Komunikasaun (MTK) liuhusi Diresaun Nasionál Infraestrutura Komunikasaun (DNIK), tinan ne’e, kontinua dezenvolve infraestrutura rede iha postu administrativu sira.

“Ami finaliza ona ninia Bill of Quantity (BoQ), nune’e tempu badak ami sei submete ba Ajénsia Dezenvolvimentu Nasionál (ADN) atu verifika tama ba prosesu konkursu públiku hodi kontinua dezenvolve tan rede infraestrutura iha postu administrativu sira iha territóriu laran,” Diretór Nasionál  Infraestrutura  no Komunikasaun, Ambrosio Amaral, informa ba Agência Tatoli, iha ninia knaar fatin, MTK, Caicoli, tersa ne’e.

Governu prevee ona orsamentu ba planu ne’e liuhusi Fundu Infraestrutura hamutuk millaun $3,5. Projetu ne’e atu kontinua Projetu Nasionál Konektividade (PNK) I ne’ebé hahú husi tinan-2008 to’o agora atu ba PNK VIII.

Notísia relevante : DNIK prepara internet ho banda 700 Mbps durante vizita Amu Papa

Infraestrutura rede ne’e sei hahú tinan ne’e no sei finaliza tinan oin, ne’ebé sei konekta ba eskola públiku iha territóriu no konekta mós ba Sentru Saúde hotu iha territóriu, ne’ebé bainhira konekta hotu sei iha ajénsia 1.000-resin mak konektada.

“Ida-ne’e signifika rede integradu, entaun bainhira ita-nia sistema internet kabu submarinu to’o mai, DNIK mós husi data center ne’e sei dada direita fiu fibra ótika ba iha loading point iha Bebonuk. Bainhira kabu submarinu konekta maka automátikamente ajénsia sira ne’ebé durante konekta mai data center DNIK nian automátikamente hetan internet ne’ebé di’ak liuhusi kabu submarinu,” nia akresenta.

Kabu submarinu fibra ótika ne’e hanesan investimentu própriu Governu nian, enkuantu DNIK prepara backbone (koneksaun) nasionál.

Iha IV Governu nia governasaun projetu eletrisidade torre boot sira haleu Timor ne’e iha ne’ebá dada tiha ona fiu fibra ótika ne’ebé haleu Timor purvota kilómetru 609.

“DNIK nia serbisu iha Projetu Nasionál Konetividade sira, ami prevee hela ba distritál entaun nia kapitál munisípiu sira ne’e kada munisípiu iha ona backbone munisipál haleu,” Diretór tenik.

DNIK serbisu bazeia ba lei orgánika MTK iha númeru 25/2023 15 setembru artigu 17, ne’ebé ko’alia kona-ba responsabilidade no dever tomak, liu-liu pontu ruma importante mak oinsá halo koneksaun infraestrutura rede fibra ótika ba ajénsia Governu hotu iha Timor-Leste no sai hanesan jestór ba distribuisaun banda larga (bandwidth) ba ajénsia Governu iha territóriu.

Diresaun daudaun konekta ona ba ajénsia 440 iha territóriu hafoin finaliza PNK VII nian inklui halo migrasaun serbisu entre ajénsia sira-ne’ebé durante ne’e tutela nia hosting sistema sira iha Ajénsia TIC Timor hamutuk 159, ne’ebé sira-nia sistema dadus rai iha Ajénsia TIC Timor .

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!