JUSTISA, HEADLINE

Governu orienta Embaixada buka solusaun ba konfrontu ne’ebé hamate Domingos do Rego iha Fátima

Governu orienta Embaixada buka solusaun ba konfrontu ne’ebé hamate Domingos do Rego iha Fátima

Ministru Negósiu Estranjeiru no Kooperasaun Timor-Leste, Bendito dos Santos Freitas, Imajen Tatoli/António Daciparu

DILI, 04 juñu 2024 (TATOLI) –  Konfrontu entre joven Timoroan sira iha Fátima Portugál, ne’ebé akontese iha madrugada loron 02 Juñu ne’e,  deskonfia envolve husi Membru Grupu Arte Marsiál balun, hodi rezulta joven mane ida ho naran, Domingos do Rego, moris iha loron 1 Dezembru 1998, husi Tula-Takeu, Munisípiu Aileu, lakon vida no na’in-lima seluk kanek grave no daudaun ne’e halo hela tratamentu saúde iha ospitál Leiria.

Ho kazu ne’e, Polísia Judisiáriu Portugueza mós hala’o investigasaun hela ba joven husi grupu rua ne’e, tanba to’o oras ne’e, seidauk identifika joven ne’ebé mate no na’in-lima seluk kanek ne’e pertense ba grupu ida-ne’ebé.

Ho konforntu ne’e, Ministru Negósiu Estranjeiru no Kooperasaun (MNEK), Bendito dos Santos Freitas, orienta ona Embaixada Timor-Leste iha Portugál atu urjentemente buka mekanizmu hodi fó solusaun ba konfrontu entre joven sira iha Portugal.

“Preokupasaun ne’ebé Membru Parlamentár sira foti kona-ba akontesimentu konfrontu trájiku entre Timoroan sira iha Portugal, MNEK halo ona chamada para halo kordenasaun urjente ho Embaixadora Timor nian iha Lisboa, atu bele haree situasaun ida-ne’e,” Ministru Bendito katak liuhusi nota ne’ebé Agência TATOLI asesu husi media MNEK, tersa ne’e.

Ministru Bendito dos Santos Freitas, hato’o liahirak ne’e, relasiona ho preokupasaun ne’ebé deputadu Parlamentu Nasionál no Públiku Timor sira-nian, kona-ba konfrontu entre joven Timoroan sira iha Fátima Portugál, ne’ebé akontese iha madrugada loron 02 fulan Juñu ne’e.

Ministru ne’e hatutan tan, “Prosesu la’o hela, ita nia Embaixada ho Polísia Judisiáriu Portugeza servisu hamutuk hodi buka solusaun ba problema refere, no mós aproximasaun ho madre sira Leiria Fátima, Embaixadora sira haree hela urjentemente problema ida ne’e no sei utiliza kanál sira hotu atu bele rezolve lalais.  Mekanizmu ida mak sei konvoka reuniaun para bele husu rekonsiliasaun ka perdaun entre membru sira”.

Daudaun ne’e, Embaixada Timor-Leste nian iha Lisboa Portugál hamutuk ho Polísia Judisiária no mós Madre sira iha Leiria Fátima, buka hela solusaun bá problema refere, nune’e bele halo rekonsiliasaun entre joven grupu sira.

Governu mós sei bolu ajénsia sira-ne’ebé mak fasilita joven sira bá Portugál ne’e, atu iha responsabilidade ba sira, nune’e antes haruka ba, tenki sira kumpre ba lei no regulamentu husi nasaun ne’e nian.

“Maibé prosesu ne’e tenki iha mós espetativas katak, Governu tenki foti mós solusaun bá ajénsia sira-ne’ebé haruka Timoroan sira bá, sira mós tenki iha responsabilidade moral atu tetu ema sira-ne’e antes bá servisu, sira-nia komprimentu bá lei no regulamentu ne’ebé atu simu Timoroan sira-ne’e, ita atu hatudu nafatin dignidade, prinsípius no valores direitus umanus no liberdade,” Governante ne’e hateten.

Notisia relevante: MNEK: konfrontu iha “Fátima” Portugál hatun imajen Timor-Leste iha mundu

Jornalista: Hortencio Sanchez

Editór   : Florencio Miranda Ximenes

iklan
iklan

Leave a Reply

iklan
error: Content is protected !!