EKONOMIA, HEADLINE

MAPPF oferese ai-naa hodi konstrui altar iha Tasi-Tolu

MAPPF oferese ai-naa hodi konstrui altar iha Tasi-Tolu

Progresu konstrusaun altar, iha Tasi-tolu, Dili, kuarta (6 maiu 2024). Imajen Tatoli/António Daciparu

DILI, 04 Juñu 2024 (TATOLI) – Ministériu Agrikultura, Pekuária, Peska no Floresta (MAPPF) oferese ai-naa hun 10 ho naruk metru haat atu konstrui altar ba selebrasaun misa ne’ebé sei prezide husi Papa Francisco iha Tasi-Tolu.

“Ne’e pedidu husi Primeiru-Ministru, Kay Rala Xanana Gusmão, ne’ebé hakarak altar ba Amu Papa ne’e tenke iha kualidade no sei sai fatin ida ba turizmu relijiozu iha futuru”, Ministru Agrikultura, Pekuária, Peska no Floresta, Marcos da Cruz, dehan iha Comoro, ohin.

Ministru Agrikultura, Pekuária, Peska no Floresta (MAPPF), Marcos da Cruz. Imajen Tatoli/Egas Cristóvão

Governante ne’e esplika katak loloos ne’e atu tau ai-teka, maibé xefe Governu hakarak iha ai orijen ne’ebé ho kualidade, tanba ne’e maka uza ai-naa no bainhira Papa fila bele tau ai ne’e iha muzeu no ne’e sai mós istória.

“Bainhira iha prosesu tesi ai-naa ne’e, mosu problema uitoan tanba guarda florestál sira iha Liquiçá, área Bubleu, fatin ai-naa moris ba ne’e la konkorda atu tesi tanba sira la hetan karta lisensa ruma husi Ministériu Agrikultura, maibé pedidu ida ne’e xefe Governu maka husu, tanba ne’e presiza apoia hodi halo buat ruma ho kualidade atu simu Amu Papa ninia prezensa iha Tasi-Tolu ne’e”, Marcos da Cruz esplika.

Iha sorin seluk, Diretór-Jerál Floresta, Raimundo Mau, dehan ai-naa ne’e tesi ona iha Liquiçá iha iha semana rua liubá. “Ita oferese ona ai-naa ho kualidade di’ak, identidade Timor-Leste nian tuir pedidu xefe Governu hodi konstrui altar ne’ebé ita-nia Papa Francisco sei halo misa ba”, Raimundo Mau salienta.

Tuir diretór, ai-naa ne’e hanesan ai protejida no kuda iha Liquiçá ne’e ho kuantidade limitadu, maibé iha hun 10 maka tesi ona, tanba tenke oferese ba preparasaun Papa Francisco nian. “Ai sira ne’e lori ona mai Dili hodi entrega ba Ministériu Administrasaun Estatál atu halo preparasaun”.

Daudaun ne’e, empreza Karya Timor halo hela konstrusaun altar no prasa Vatikanu iha Tasi-Tolu ho medida diametru 50, altar iha metru 17×35, ne’ebé gasta orsamentu hamutuk millaun $1.

Dezeña ba kontrusaun altar ne’e aprezenta husi Vatikanu no Governu no Igreja Timor-Leste hetan parseira di’ak hodi konstrui obra ne’e.

Konstrusaun altar ne’e lansa ona fatuk dahuluk iha loron 19 Abríl ne’ebé partisipa direta husi Núnsiu Apostóliku Vatikanu iha Timor-Leste, Marco Sprizzi, no Arsebispu Arkedioseze Metropolitana Dili, Dom Virgílio Kardeál do Carmo da Silva, SDB.

Iha Setembru, entre loron 09 no 11, Timor-Leste sei simu vizita pastorál Papa Francisco nian.

Notísia relevante: Papa Francisco prezide misa solene iha Tasi-Tolu, igreja prepara ministru estraordináriu 4.000

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!