SOSIEDADE SIVĺL

Papa Francisco prezide misa solene iha Tasi-Tolu, igreja prepara ministru estraordináriu 4.000

Papa Francisco prezide misa solene iha Tasi-Tolu, igreja prepara ministru estraordináriu 4.000

Arsebispu Arkidioseze Metropolitana Dili, Don Virgílio do Carmo da Silva, SDB, kaer liman ho Papa Francisco iha Vatikanu. Imajen/Espesial.

DILI, 30 Maiu 2024 (TATOLI)–Arsebispu Arkedioseze Metropolitana Dili, Dom Virgílio Kardeál do Carmo da Silva, SDB, hateten igreja timorense sei prepara mós ministru estraordinariu hamutuk 4.000 atu bele ajuda fahe komuñaun iha misa solene ne’ebé Papa Francisco prezide iha Tasi-Tolu.

Papa Francisco nia vizita pastoral Iha Timor-Leste hahú husi loron 09-11 setembru 2024 ne’e, igreja presiza ministru estraordináriu tanba amu-lulik no madre sira-ne’e de’it sei la to’o.

Notísia Relevante: Ekipa Vatikanu sei avalia tan preparasaun simu Papa Francisco iha juñu

“Ita presiza prepara tan ema-ne’ebé fahe komuñaun pelu menus ema 4.000, entaun ida-ne’e mai hosi ne’ebé, ita husu pároku sira hotu atu kada pároku sira rekruta. Episkopál fó ona dekretu ka orientasaun ida atu kada parokia rekruta ema 40,” Dom Virgílio Kardeál do Carmo da Silva, SDB, hateten ba jornalista sira iha selebrasaun Corpo de Deus, iha Lecidere.

Amu bispu hateten, igreja mós prepara soboriu ne’e mó 4.000 atu nune’e bele disponibiliza ba hotu-hotu no agora daudaun preparasaun la’o hela.

“Ami kontinua servisu hamutuk ho Governu, tanba iha dia 01 juñu agora ne’e, sei mai tan fali delegasaun Vatikanu nian hodi bele reavalia preparasaun igreja no Governu nian kona-ba vizita Papa nian iha setembru mai ne’e,” nia dehan.

Delegasaun Vatikanu nian sei halo inspesaun ba daruak entre dia 01-5 juñu, nune’e sábadu (01/06) agora sira to’o, deskansa uituan no iha loron tolu no haat nia laran ne’e sei halo enkontru no haree preparativu sira la’o oinsá, entaun buat hotu iha planu ona no hein atu ezekuta de’it.

“Ita sei esforsu iha fulan tolu nia laran hodi bele finaliza buat hotu hodi simu Papa Francisco vizita Timor-Leste,” amu-lulik ne’e dehan.

Tuir nia, preparasaun ba vizita Papa Francisco mai Timor-Leste nian ne’e to’o agora atinje ona 50%, no bainhira atinje 100% ona entaun signifika Timor-Leste pronto simu Papa Francisco nia vizita pastorál iha loron 09-11 setembru tinan 2024.

Notísia Relevante: Marco Sprizzi: Konstrusaun altar santu iha Tasi-Tolu sei hela hanesan muzeu

Jornalista : Jesuína Xavier

Editór        : Cancio Ximenes

iklan
iklan

Leave a Reply

iklan
error: Content is protected !!