DILI, 30 abril 2024 (TATOLI)–Vise Kordenadór ba preparasaun vizita Papa nian husi igreja no atuál Pároku Igreja Santu António Motael, Guilhermino da Silva, hateten iha fulan-juñu ne´e ekipa avaliasaun husi Vatikanu sei fila-fali mai atu avalia tan Timor-Leste nia preparasaun simu Papa Francisco hala’o vizita pastorál durante loron tolu iha setembru 2024.
Notísia Relevante: Marco Sprizzi elojia preparasaun Estadu kona-ba Papa Francisco vizita TL
“Data ne’e seidauk fiksu tanba iha loron 01 fulan-juñu delegasaun husi Vatikanu sira mai mak foin fó hatene ita. Sira sei mai avalia no haree ita-nia preparasaun hotu depois sei hateten oras misa nian ne’e hotu (no atividadade sira seluk),” Vise Koordenadór ba preparasaun vizita Papa nian hosi igreja ne´e hateten ba Agência Tatoli, iha nia rezidensia Motael, tersa ne´e.
Iha fulan-juñu ne´e, sei hatene oráriu kompletu kona-ba Papa Francisco hala’ o vizita pastoral iha Timor-Leste, tanba ekipa Vatikanu sei mai avalia kona-ba preparasaun Timor-Leste nian kona-ba vizita ne’e.
Antes ne´e, delegasaun Vatikanu mai tiha ona iha fulan-janeiru hodi halo inspesaun ba iha fatin sira-ne’ebé Papa atu halo vizita ba ne´e, tanba ne’e mak Governu ho igreja daudaun ne´e halo preparasaun hodi hadi’a fatin sira-ne´e.
Tuir nia, preparasaun einjerál atinje ona 20% ba leten, hanesan ezemplu preparasaun fatin ba enkontru iha Sentru Konvensaun Dili (CCD, sigla portugés) aprezenta ona ba ami komisaun sira to’o ona 60% no altar iha iha Tasi-tolu agora ne’e atinje ona 30%.
Notísia Relevante: Preparasaun simu Papa Francisco: Empreza Eureka Gagas Utama reabilita igreja Motael
Paróku Motael ne´e esplika, dezeñu altar ne’e prepara hosi komisaun no aprezenta ba parte tékniku Vatikanu konkorda no Vatikanu konkorda mak hahú konstrui obra ne´e.
Saserdote ne’e hateten, ekipa komisaun organizadora Timor-Leste prepara planu maibé presiza iha konfirmasaun hosi Vatikanu hanesan preparasaun obra fízika no espirituál hanesan liturjia, koru no dekorasaun altar ba misa nian ne´e.
“Ita mak prepara, ita mak komisaun maibé ita lahalo bu’at sira-ne’e mesak. Ita iha kordenasaun no konsulta ekipa iha Roma. Tanba ne’e mak loro-loron seksaun sira tenke hatama planu, atu nunsiatura kontatu nafatin ho Vatikanu,” nia dehan.
Igreja Timor-Leste sei halo preparasaun mós ba sarani sira hanesan katekeze no prepara livru oan ida ka manuál hodi distribui ba dioseze tolu kona-ba sé mak Papa Francisco, objetivu vizita Papa nian no tanba saida mak Papa Francisco vizita Timor-Leste.
Tuir nia, preparasaun ba manuál sei aprezenta iha loron 18 maiu hodi ba komisaun nasionál, antes halo distribuisaun ba iha dioseze sira hodi halo formasaun ba sarani sira.
Notísia Relevante: Empreza Karya Timor sei finaliza konstrusaun altar misa Amu Papa durante fulan-haat
Jornalista : Jesuína Xavier
Editór : Cancio Ximenes