EDUKASAUN, BOBONARO, HEADLINE, MUNISÍPIU

ME sosializa programa intensivu edukasaun pre-eskolár iha Bobonaro

ME sosializa programa intensivu edukasaun pre-eskolár iha Bobonaro

Ministériu Edukasaun halo sosializasaun ba programa Instensivu edukasaun pre-eskolár tinan 2024 iha munisípiu Bobonaro. Imajen Tatoli/Sérgio da Cruz.

BOBONARO, 04 maiu 2024 (TATOLI) – Ministériu Edukasaun (ME), tersa ne’e soaliza programa intensivu edukasaun pre-eskolár tinan 2024 ba autoridade postu no líder komunitária sira iha munisípiu Bobonaro.

Xefe Departamentu Asesu Kualidade Edukasaun Pre-Eskolár hosi Ministériu Edukasaun, Leopoldo dos Santos de Jesus, informa, IX Governu implementa programa ne’e atu tulun labarik ho idade tinan 3 to’o 5 ne’ebé laiha oportunidade atu asesu edukasaun Pre-eskolár tanba dadus hatudu to’o agora labarik 30% de’it foin asesu edukasaun sedu.

Notísia relevante: Autoridade Bobonaro lansa konstrusaun foun pre-eskolár Gelokaer Daitete

“Ita atu lori labarik sira iha territóriu  nasionál pelumenus molok mandatu IX Governu remata 60% labarik iha Timor laran ne’e bele asesu edukasaun sedu,” Nia informa ba Jornalista sira iha salaun inkontru administrasaun postu administrativu Maliana.

Nia Dehan, programa intensivu edukasaun pre-eskolár tinan 2024 ne’e hatuur ona iha dekretu-lei númeru 34/2023, 31 maiu ne’ebé hetan ona promulgasaun husi Prezidente Repúblika.

Programa ne’e implementa tanba dadus husi estatístika identifika katak iha área insidénsia labarik barak la asesu edukasaun pre-eskolár.

Programa ne’e implementa Ministériu Edukasaun servisu hamutuk ho Ministériu Administrasaun Estatál atu orienta líder komunitária sira rekolla informasaun kona-ba labarik sira-ne’ebé la asesu edukasaun.

“Iha lei suku númeru 9/2018 atribui ona kompeténsia iha artigu ba xefe suku sira, ida atu mobiliza komunidade sira kona-ba importánsia edukasaun, nune’e mós atu minimiza labarik sira abandona eskola,” nia hateten.

Sekretáriu Autoridade Munisipál Bobonaro ba Asuntu Sosiál, Júlio Carvalho Caero, orienta líder komunitária suku 50 atu rekolla dadus iha terrenu, tanba dadus estatístika hatudu partisipasaun labarik idade 3 to’o 5 iha munisípiu Bobonaro ba edukasaun pre-eskolár sei mínimu.

“Ida-ne’e sai preokupaaaun boot, ne’e líder komunitária sira foti dadus sira ne’e kona-ba la asesu pre-eskolár depois razaun saida, ami bele propoin iha planu, tanba buat hotu-hotu ne’e bazeia ba dadus, se laiha dadus, ita halo eskola hotu tiha, depois abandona,” nia hateten.

Diretór Servisu Munisipál Edukasaun Munisípiu Bobonaro, Miguel Freitas, konsidera liuhusi sosializasaun ne’e bele hetan opiniaun balu husi líder komunitária sira nune’e ba futuru bele hetan solusaun ne’ebé di’ak hodi atinje meta Governu katak labarik 100% iha Timor laran tomak tenke asesu edukasaun pre-eskolár.

“Tuir dadus sei iha 30% mak foin asesu edukasaun pre-eskolár, falta 70%, entaun ho ida-ne’e pelumenus ita bele esforsu nune’e bele hetan solusaun ne’ebé mak di’ak,” nia akresenta.

Tuir dadus pre-eskolár ne’ebé eziste iha munisípiu Bobonaro hamutuk 20 no planu governu sei estabelese tán rua iha postu administrativu Balibó.

Notísia relevante: MEJD sei kontinua projetu komunitária 117 iha edukasaun pre-eskolár

Jornalista   : Sergio da Cruz
Editór           : Evaristo Soares Martins

iklan
iklan

Leave a Reply

iklan
error: Content is protected !!