Membru PN lamenta joven timoroan halo krime iha Fátima-Portugál

DILI, 04 maiu 2024 (TATOLI)—Membru Parlamentu Nasionál (PN) liuhusi Deputadu bankada CNRT, Natalino dos Santos, lamenta tebes ho indivídu ka oknum joven timoroan  halo krime iha Fátima Portugál.

Notísia Relevante: Governu orienta Embaixada buka solusaun ba konfrontu ne’ebé hamate Domingos do Rego iha Fátima 

“Triste tebes, ita rona. Nu’udar timoroan, ita sente moe tanba primeiru ita timoroan koñese maiória ema Katólika, ema fiar-na’in, depois sira ba iha ne’eba halo fali problema iha fatin ida ne’e. Nu’udar timoroan sente triste no moe tebe-tebes ba aktu sira-ne’e,” nia hateten ba jornalista sira iha resintu Parlamentu Nasionál, tersa ne’e.

Tan ne’e, nia lamenta tebes ho oknum ka indivídu sira-ne’ebé halo krime iha fatin sagradu ne’eba, loloos labele halo aktu sira-ne’e tanba ita Timor-Leste ne’e ema koñese hatene maiória ema Katólika ema fiar na’in.

Ba situasaun ne’e, Deputadu membru komisaun B ne’ebé trata asuntu Negósiu Estranjeiru no Defeza ho Seguransa husu ba autoridade kompetente iha Portugál atu prosesa ema sira-ne’ebé halo krime ne’e hodi bele iha responsabilidade aktu sira-nian ne’ebé iha.

Kona-ba ho akontesimentu ne’e, Estadu Portugál hasai ona desizaun hodi altera lei nune’e ema imigrante sira tama tenke ho vistu traballu mak buka serbisu iha ne’eba, la’ós imigrante ho vistu turista, Deputadu Natalino dehan, ne’e depende soberania ema nia Estadu atu halo lei ka alterasaun ba lei vijente ne’e kompeténsia Estadu soberanu Portugál nian.

Nia mós hato’o katak, ho akontesimentu ne’e labele jeneraliza timoroan hotu iha Portugál tanba balun ba hala’o estudu no serbisu oinsá sira hatene tau sira-nia aan iha ne’eba, maibé ba oknum ka indivídu sira-ne’ebé laiha responsabilidade halo violénsia, entaun husu ba Governu Portugál  liuhusi entidade kompetente iha ne’eba atu prosesa sira tuir lei Portugál hodi responsabiliza aktu ne’ebé halo.

Membru PN ne’e bolu atensaun ba embaixadór ka konsoladu sira iha Portugál atu halo akompañamentu sira-nia serbisu iha ne’eba, atu buka tuir timoroan sira iha ne’eba tenke iha komunikasaun diálogu hodi hato’o nafatin TL nia kultura respeitu no kultura nu’udar timoroan solidáriu ba malu hodi labele halo buat ne’ebé hafoer Timor nia naran.

Deputadu FRETILIN, Antonino Doutel Sarmento, konsidera akontesimentu ida-ne’e fó imajen ladi’ak ba TL hanesan nasaun indepedente ida, hanoin katak joven sira ba iha ema-nia rai liuliu rai sira sivilizadu no liuliu tan fatin sira hanesan Fátima, fatin ida ne’ebé mak ema mundu tomak halo vizita no halo orasaun hodi buka salvasaun ba sira-nia vida, maibé ikus akontesimentu sira-ne’ebé mak la espera no akontesimentu ne’e fó marjen negativu ba Timor-Leste.

Hanesan nasaun, iha relasaun diplomátiku nasaun maun-alin ho Portugál, entaun akontesimentu sira-ne’e loloos labele akontese ba joven timoroan sira iha ema-nia rain, bainhira buka halo serbisu hodi iha osan fasilita moris maibé halo fali problema ida-ne’e la’ós hamoe de’it família maibé hamoe Timor-Leste nia dignidade.

“Moralmente monu, tanba iha rai sira sivilizadu hanesan Portugál, liuliu iha Fátima nu’udar fatin distinasaun mundialmente ema hotu-hotu halo vizita iha ne’eba halo orasaun, buka oinsá mak atu hetan pás, maibé to’o ikus ita ba halo fali sala ne’ebé ladi’ak ba ita-nia moris no ligadu ba ita-nia nasaun nia dignidade,” nia dehan.

Tanba ne’e, nia husu autoridade kompetente Portugál nian tenke prosesa indivídu ne’ebé halo krime tuir lei Portugál ne’ebé halo kauza joven ida mate no na’in-lima seluk kanek todan.

Deputadu KHUNTO, Antonio Verdiál de Sousa, mós lamenta ho akontesimentu ne’e no husu embaixada Timor-Leste iha Portugál atu bele halo akompañamentu ba kestaun ne’e.

Jornalista : Nelson de Sousa

Editór        : Cancio Ximenes