HEADLINE, INKLUZAUN SOSIÁL

Ministru Assanami husu timoroan iha rai-li’ur mantein konsiénsia no disiplina

Ministru Assanami husu timoroan iha rai-li’ur mantein konsiénsia no disiplina

Vise Primeiru-Ministru, Ministru Asuntu Sosiál no Ministru Dezenvolvimentu Rurál no Abitasaun Komunitáriu, Mariano Assanami Sabino. Imajen Tatoli/Francisco Sony

DILI, 04 juñu 2024 (TATOLI)Vise Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, husu timoroan sira iha rai-li’ur tenke mantein konsiénsia no disiplina tanba reprezenta nasaun Timor-Leste.

“Bainhira hakat ain ona husi Timor-Leste, imi mós sai hanesan Embaixadór ida, tenke proteje nasaun tanba imi ba kaer pasaporte Timor-Leste. Ita-nia atitude hotu ne’ebé halo iha li’ur reprezenta hotu Timor, ne’ebé tenke proteje ita-nia rai, imi-nia serbisu kiik ka boot kontribui ba rai ne’e, ne’ebé mantein nafatin imi-nia konsiénsia no disiplina hodi hatudu identidade Timor iha ema-nia rai ho di’ak,” Vise Primeiru-Ministru hateten bainhira partisipa semináriu nasionál kona-ba valoriza direitu ema ho defisiénsia, iha salaun Ministériu Transporte no Komunikasaun (MTK), Caicoli, tersa ne’e.

Notísia relevante : Membru PN lamenta joven timoroan halo krime iha Fátima-Portugál

Nia nota, konfrontu iha Fátima Portugal ne’ebé envolve timoroan hatudu tebes imajen ladi’ak.

“Hotu-hotu hatene, presiza tempu naruk ba ita-nia luta, ita sempre iha devoasaun ba Na’in-Feto, Nossa Senhora de Fátima tanba ita-nia luta nia akompaña ita no ita halo peregrinasaun iha fatin-fatin hodi hasa’e orasaun ba nia no liuhusi peregrinasaun ida-ne’e mak ita mós kria klandestina halo komunikasaun entre ai-laran mai vila laran no husi fatin ida bá fatin ida ema laiha revista,” nia akresenta.

Assanami deskreve, ohin loron Timor-Leste ukun-an restaura valór sira ne’e, maibé sidadaun balun hatudu hahalok ladi’ak iha fatin sagradu hanesan Santuáriu Fátima Portugal, ne’ebé sai fatin respeita mundiál ka fatin turizmu relijiozu no Timor-Leste nu’udar katólika 99% mak akontese situasaun ne’e, hatudu imajen ladi’ak.

“Ha’u husu deskulpa ba hotu-hotu, ha’u ladun tama ba problema ne’ebé akontese iha ne’ebá maibé ha’u husu timoroan hotu bainhira hakat ain husi ita-nia rai bá rai-li’ur no kaer ona pasaporte, imi mak embaixadór ne’ebé reprezenta Timor-Leste. Ita-nia atitude refleta ba identidade nasionál no povu ida-ne’e, ita tenke mantein asegura ita-nia lutadór sira no tau Timor iha mundu hatudu buat di’ak,” nia salienta.

Vise Primeiru-Ministru husu hotu-hotu nia orsaun ba timoroan iha li’ur atu restaura filfafali sira-nia naran no dignidade iha rai-li’ur, ne’ebé reprezenta Timor-Leste nune’e labele akontese tan iha Portugal no fatin seluk.

Nia konsidera, situasaun ne’ebé akontese iha Fátima Portugal ne’e bele afeta no taka dalan ba sidadaun sira seluk atu tama ba Portugal ho livremente tanba fatin ne’ebá hanesan turístiku relijiozu ne’ebé hatama osan barak ba Portugal.

“Relasiona ho akontesimentu ne’e Ministériu Negósiu Estranjeiru Kooperasaun (MNEK) iha ona enkontru ho liña ministeriál hotu atu foti asaun konkreta ba situasaun ne’e, ne’ebé desizaun ne’e sei foti husi MNEK,” nia informa.

Jornalista      : Arminda Fonseca

Editora           : Julia Chatarina

iklan
iklan

Leave a Reply

iklan
error: Content is protected !!