DILI, 03 juñu 2024 (TATOLI)– Ekipa istimadu husi Munisipiu Baucau Mulia FC susesu iha jornada ikus faze grupu hodi manán nia adversáriu Surya Lafaek FC maibé ho golu mihis 2-1, iha jogu kopa Maun Boot Kay Rala Xanana Gusmão ne’ebé realiza iha Estádiu Munisipál Dili, tersa lokoraik ne’e.
Bainhira jogu la’o ekipa rua iha ambisaun ne’ebé maka’as hodi buka hatama golu. Tanba ne’e jogadór sira tenke lansa kontra no atake ba malu tuir tékniku no abiliade ekipa idaidak nian.
Surya hatudu jogu ne’ebé ho intensidade maka’as, buka meiu oioin oinsa hatama golu lais, Mulia mós la nonok hatudu jogu, halo presaun maka’as hasoru Surya.
Adeptus atus ba atus tuur iha tribun Estádiu nian hakilar ho lian maka’as hodi fó kontente ba jogadór sira iha kampo laran nune’e bele hala’o jogu ne’ebé furak liutan.
Avansadu Surya lansa atake maka’as, maibé Mulia la fó fatin hodi hamate tutuir jogu ne’ebé mak Mulia lansa. Ho nune’e Mulia susesu duni iha nia jogu tanba iha minutu 27, jogadór Elisio Moreira (22), lansa ona golu primeiru hodi muda rezultadu ba 1-0.
Golu ne’e halo Surya tenke servisu maka’as liutan iha kampo laran. Servisu ne’ebé Surya halo la hela de’it hanesan servisu, tanba iha minutu 29, jogadór Rivaldo Soares (22), responde ona golu primeiru hodi muda rezultadu ba 1-1.
Golu ne’e hanesan golu ikus iha minutu primeira parte tanba to’o minutu normal parte dala uluk nian termina laiha tan golu ruma mak akontese nune’e ekipa rua tenke hela provizóriu ho empata 1-1.
Dolar ba segunda parte ekipa rua nafatin lansa kontra no atake ba malu tuir tékniku ida idak nian, jogu la’o ho velosiade maka’as liután, minutu la’o ho kalma, jogadór sira hikis kosar maka’as ho objetivu hadau pontu tolu.
Jogadór sira mantein iha pozisaun, pasa bola ba mai, Surya hatudu jogu bola long ka bola aas, ansi hatama golu, halo mós jogu defensivu, maibé Mulia mós joga ho ofensivu ansi hatama golu.
Ikus mai Mulia iha forsa ne’ebé Extraordináriu halo Surya susar domina bola, nune’e iha minutu 48, jogadór Alexandre Moreira (9), konsege fura rede Surya hodi muda rezultadu ba 2-1. Golu ne’e fó sorte aat ba Surya tanba labele ona ultrapasa ba jogu 16 finál.
Ho forsa ne’ebé hanesan to’o minutu jogu termina laiha tan golu ruma mak akontese, nune’e vitória prega metin ba Mulia no Surya hela ho derrota.
Vitória ne’e lori Mulia hada’u pontu tolu no Mulia, daudaun ne’e hetan pontu haat. Iha pozisaun dahuluk grupu B lidera husi Kampung Alor FC ho pontu hitu. Iha pozisaun daruak seidauk hatene loos tanba Bita-Ba FC ho pontu haat, Mulia FC mós iha pontu haat, komisaun sei haree husi regulamentu hotu futeból nian hodi foti desizaun se loos mak atu tur iha pozisaun segundu hodi hakat ba jogu 16 finál. Enkuantu Surya Lafaek husi jogu tolu rekolla de’it pontu ida no sai ona husi jogu.
Notísia relevante: Coach Eleven ‘tebe sai’ Naimeco FC ho rezultadu 4-1 iha kopa Xanana
Jornalista: Hortencio Sanchez
Editór : Floremcio Miranda Ximenes
