EKONOMIA, MUNISÍPIU, VIQUEQUE

PAM Viqueque lamenta MOCATIL fornese koto fohuk ba programa merenda eskolár

PAM Viqueque lamenta MOCATIL fornese koto fohuk ba programa merenda eskolár

PAM Viqueque ho ekipa deteta MOCATIL fornese produto koto ho kondisaun fohuk. Imajén Tatoli/Vitorino Lopes da Costa

VIQUEQUE, 04 juñu 2024 (TATOLI)- Prezidente Autoridade munisípiu Viqueque, Francisco C.S de Gonzaga Soares, lamenta tebes ba Distributór  Movimentu Kamponez Timor-Leste (MOKATIL), ne’ebé fornese koto fohuk karun 30 ba programa merenda eskolár tanba bele fó impkatu ba estudante sira nia saúde bainhira konsumu.

Lamentasaun ne’e, PAM Viqueque hato’o hafoin hamutuk ho Diretór Servisu Edukasaun Munisípiu Viqueque Servisu Saúde Viqueque, Diretór Fiskalizasaun, no Autoridade lokál bá halo inpesaun no deteta produtu lokál sira-ne’e MOCATIL fornese ba programa merenda eskolár, kuaze produtu hirak ne’e balun ho kondisaun fohuk to’o metan.

Produto koto. Imajén Tatoli/Vitorino Lopes da Costa

“Ha’u lamenta no husu ba MOCATIL tenke troka produtu lokál ho varidade koto ne’e, hafoin ita bele halo distribuisaun ba eskola sira hodi estudante sira bele konsumu. Tanba fohuk ne’e mak ita fó de’it ba labarik sira bele fó impaktu ba labarik sira-nia saúde”,Francisco C.S de Gonzaga Soares, hateten ba Agência TATOLI, hafoin ramata halo inspesaun ba produtu distribuitór MOCATIL, iha armazén servisu Edukasaun munisípiu Viqueque, ohin.

Autoridade munisipál fó atensaun kedan ba fornesedór MOCATIL atu ba oin presiza atesaun ba kualidade produtu sira-ne’ebé atu distribui ba eskola sira iha munisípiu Viqueque.

Tuir Planu produtu referida sei distribui ba Ensinu Báziku Centrál (EBC, sigla Portugés) no Ensinu Báziku Filiál 77 iha munisípiu Viqueque.

“Ita deside labele distribui lai tanba Distributór MOCATIL presiza hatama fali koto ho kualidade di’ak, nune’e estudante sira bele konsumu ho di’ak. Bainhira hatama koto foun mak bele distribui” nia afirma.

MOCATIL prontu troka

Hatan ba produtu koto fohuk ne’e,  Reprezentante MOCATIL, Alvino da Costa Guterres, afirma prontu troka produtu koto fohuk ka laiha kualdiade ne’e ho karun hamutuk 30.

“Produtu koto fohuk ne’ebé ohin ita-nia autoridade haree dehan kualidade laiha ne’e, ami sei aprezenta ba ami-nia Prezidente MOCATIL. Maibé, ami prontu atu troka koto fohuk ne’e molok distribui ba eskola sira”, nia kompromete.

Tuir dadús produtu sira-ne’ebé MOCATIL fornese ba programa merenda eskolár mak hanesan, foos tonelada 30 ne’ebé mai husi nasaun India, koto saku 40 ne’ebé sosa iha rai-laran, manu-tolun kaixa 50 no mina konsumu kaixa 50 ne’ebé mai husi nasaun Indonézia.

Daudaun ne’e, Distributor MOCATIL prepara kondisaun armazén hodi distribui fali manu broiller ba programa merenda eskolár.

Inspesaun ba produtu husi MOCATIL ne’ebé distribui ba Servisu Edukasaun Munisípiu Viqueque partisipa husi Servisu Saúde Viqueque, Diretór Fiskalizasaun, Diretór Servisu Edukasaun Munisípál no Autoridade lokál.

Notisia relevante:PAM Viqueque husu implementadór merenda eskolár tenke garante hahán moos-ijiéne

Jornalista :Vitorino Lopes da Costa

Editór       : Florencio Miranda Ximenes

iklan
iklan

Leave a Reply

iklan
error: Content is protected !!