iklan

NASIONÁL, HEADLINE

Akademista husu ba Governu foti medida ba asaun joven timoroan iha Fátima Portugal

Akademista husu ba Governu foti medida ba asaun joven timoroan iha Fátima Portugal

Reitór UNTL, João Martins. Imajen Tatoli/António Daciparu

DILI, 05 juñu 2024 (TATOLI)–Reitór Universidade Nasionál Timor-Lorosa’e (UNTL), João Martins, husu ba Governu atu buka dalan solusiona kazu konfrontu ne’ebé envolve joven timoroan iha Fátima, Portugal.

“Hanesan akademista ida, ha’u hanoin la presiza akademista de’it, nu’udar timoroan, ha’u sente triste tebes, em fez de joven ne’e buka apreende no serbisu maibé ba baku malu iha ema-nia rain, piór liu mak iha loos fatin sagradu hanesan Santuáriu ne’ebé ema iha mundu tomak bá vizita. Ita triste tebes, nune’e apela ba Governu, liu-liu Ministériu Négosiu Estranjeiru no Kooperasaun (MNEK) atu serbisu maka’as hodi rezolve problema ne’e no hakalma situasaun tanba ida-ne’e imajen ladi’ak Timor-Leste nian iha mundu,” Reitór UNTL hateten iha salaun Komisaun Nasionál Eleisaun (CNE, sigla portugés), Caicoli, kuarta ne’e.

Nune’e mós, Dosente Komunikasaun UNTL, Roberto Pacheco, konsidera asaun joven iha Portugal estraga imajen Timor-Leste iha mundu, nune’e presiza aplika lei rigór ba sira.

“Kona-ba joven sira ne’ebé hatudu hahalok kriminozu iha Portugal, tuir hau-nia haree katak sira tenke hatan ba sira-nia hahalok ne’e no aplika lei vigora iha ne’ebá. Hahalok violentu ne’e hamonu ita-nia naran iha mundu, afinál ita-nia nasaun ne’e 97% ema katóliku. E mais pior joven sira halo hahalok ne’e iha Fátima ne’ebé koñesidu hanesan fatin ba hasa’e orasaun,” nia akresenta.

Notísia relevante : Konfrontu timoroan iha Fátima la fó impaktu ba kooperasaun bilaterál entre TL ho Portugál

Pacheco dehan, joven sira-ne’ebé komete krime di’ak liu deporta hotu mai Timor.

“Governu portugés labele antipatia ho imigrante sira, liu-liu ho timoroan sira ne’ebé buka serbisu iha Portugal ne’ebá.Tanba joven sira-ne’ebé oras ne’e hatudu hahalok bandalizmu iha Portugal ne’e mós kuandu haree fali ba kotuk, ha’u hanoin kontribuisaun husi sira-nia Governu mós. Ho situasaun ne’ebé akontese iha Portugal, ita-nia Estadu di’ak liu labele nonok ho situasaun ne’e tenke halo buat ruma hasoru joven kriminozu sira-ne’e,” Pacheco sujere.

Nu’udar akademista, nia husu ba estudante sira ne’ebé hala’o hela estudu iha Portugal atu foku ba prosesu aprendizajen.

“Ha’u hanoin la presiza preokupa ho situasaun ne’e, husu atu nafatin konsentra ba estudu no aproveita didi’ak ba, nune’e bainhira fila mai bele kontribui ba dezenvolvimentu nasaun nian,” nia fó hanoin.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!