INTERNASIONÁL, DILI, HEADLINE

Konfrontu timoroan iha Fátima la fó impaktu ba kooperasaun bilaterál entre TL ho Portugál

Konfrontu timoroan iha Fátima la fó impaktu ba kooperasaun bilaterál entre TL ho Portugál

Diretor Jeral, ba asuntu relasaun bileteral, Europa, Amerika latina no Africa, Francisco Dionísio Maukura. Imajen/Tatoli

DILI, 04 juñu 2024 (TATOLI) –Diretól Jerál ba Asuntu Bilaterál ba Amérika, Europa no Afrika iha Ministériu Negósiu Estranjeiru no Kooperasaun (MNEK), Francisco Dionisio Fernandes Maukura, hateten konfrontu entre joven timoroan iha Fátima, foin lalais ne’e, hanesan problema pesoál, nune’e sei la fó impaktu ba kooperasaun bilaterál entre Timor-Leste no Portugál.

“Konfrontu ka problema ida foin lalais ne’e individu, Nune’e sira ne’ebé halo problema tenke responsabiliza ba aktu ne’ebé sira rasik halo, Maibé ita-nia kooperasaun bilaterál Portugál kontinua metin liután hanesan nasaun amigu,” Maucura hatete ba Agência TATOLI iha edifisiu MNEK Dili, kuarta ne’e.

Notisia relevante:Governu orienta Embaixada buka solusaun ba konfrontu ne’ebé hamate Domingos do Rego iha Fátima

Liga ho mudansa politika ne’ebé Governu Portugál, nia dehan Timor-Leste halo ona analiza kona-ba empregu nian ne’ebé nasaun rua asina ona iha fulan-outubru tinan kotuk laiha impaktu no kontinua nafatin ba oin.

“Ita nia akordu iha parte empregu nian ne’ebé SEFOPE ho parte husi Portugál nian, entaun ami husi MNEK ne’ebé responsabiliza relasaun diplimatika no relasaun bilaterál ho Portugal konfirma no haree la fó impaktu, entaun ami haree koordena ho SEFOPE, nune’e bele ezekuta didi’ak asuntu ne’e iha materia empregu nian,” nia tenik.

Daudaun, MNEK servisu maka’as hela iha faze koordenasaun tanba akordu iha ona no Governu tenke haree uluk esperensia joven sira nian bainhira foti desizaun hodi haruka traballadór ba servisu iha Portugál.

“Akordu iha ona, entaun ita sei koordena interna lai, atu nune’e ita haree lai esperensia joven sira nian, hanesan balun ne’ebé ita haruka ona ba Korea Súl, Austrália. Agora Portugál nian ita atu haree nia modalidade ne’e oinsá, nune’e ita mós haree lai nia prioridade, atu ba Portugál ne’e atu servisu iha industria saida, tenke difine lai área setorál, ita nia joven ba ne’e servisu iha agrikultura ka turizmu ospitalidade ka oinsa, ida ne’e mak ita sei koordena interna,” nia katak.

Maske sei liu prosesu lubuk ida, maibé Governu nafatin esforsu nune’e bele haruka timoroan ba servisu iha Portugál bazeia ba akordu ne’ebé asina ona.

“Prosesu sei naruk uitoan, ita haruka joven sira ba servisu iha área oioin, entaun ita presiza fó lai formasaun ba sira tuir área ne’ebé mak sira atu ba servisu, ida tan mak lingua ne’e mós presiza, maibé ami serviosu maka’as oinsa bele haruka ita nia joven sira ba servisu,” nia hatete.

Bainhira prosesu hotu loos ona Governu presiza fó mós formasaun ba traballadór sira, nune’e ba servisu iha Portugál ho disiplina, halo tuir regra, no kultura ne’ebé iha.

Prezidente Portugál foin promulga lei imigrasaun foun. Lei imigrasaun foun ne’e implika mós mai Timor-Leste tanba  uluk hola billete de’it bele ona viajen ba Portugál, maibé agora tenke aplika vistu iha Embaixada Portugál nian iha Dili, molok halo viajen

Alende ne’e,  iha lei imigrasaun foun ne’e la fó ona Timor-Leste utiliza vistu turista atu hela kle’ur iha Portugál hodi buka servisu. Bainhira atu ba servisu iha Portugál tenke aplika uluk vistu traballu ho kontratu ne’ebé klaru husi kompaña sira husi Portugál.

“Ita nia sidadaun sira atu ba servisu iha Portugál antes ba tenke hetan uluk vistu traballu ho kontratu ne’ebé klaru husi empreza ne’ebé atu fó servisu, sira ba ne’e atu servisu iha área saida, kondisaun traballu, servisu iha tinan hira no tinan hira hotu tenke fila ona,” nia relata.

Polisia Portugál detein autor ba konfrontu 

Diretór Jerál ne’e informa, kona-bá konfrontu iha Fátima Portugál iha ona prosesu investigasaun husi autoridade seguransa Portugál nian.

“Prosesu hotu kona-ba akontesimentu ne’e sei iha hela prosesu investigasaun husi autoridade seguransa Portugál nian. Bainhira mak daudaun ne’e kaptura ona ita seidauk iha informasaun, maibé iha semana oin tan ita hetan ona dadus kona-ba problema ne’e,” nia hatutan.

Tanba ne’e, prosesu hotu hein desizaun husi Governu Portugal halo julgamentu ba timoroan hirak ne’e tuir lei Portugal nian no deporta fila.

“Ita hein desizaun husi Portugal, bainhira Governu Portugál foti desizaun julga timoroan sira iha Portugál tuir lei ne’ebá nian ou deporta fila mai, se deporta fila mai ita prepara ona, Polisia mak ba hein sira iha Aeroportu foti lori liu ba prizaun preventiva depois mak submete ba tribunál hodi foti desizaun se mak komete ba sidadaun ida mate ne’e ba kumpre saida mak tribunál fó no balun ne’ebé la involve bele livre,” nia hakotu.

Konfrontu deskonfia envolve husi Membru Grupu Arte Marsiál no arte rituál balun hodi rezulta joven mane ida naran Domingos do Rego, moris iha loron 1 Dezembru 1998, husi TulaTakeu, Munisípiu Aileu, lakon vida no na’in-lima seluk kanek grave no daudaun ne’e halo hela tratamentu saúde iha ospital Leiria.

Polísia Judisiáriu Portugueza mós dadauk ne’e, investiga hela joven husi grupu rua ne’e, tanba to’o oras ne’e, seidauk identifika joven ne’ebé mate no na’in lima seluk kanek ne’e pertense ba grupu ida-ne’ebé.

Notisia relevante:MNEK: konfrontu iha “Fátima” Portugál hatun imajen Timor-Leste iha mundu

Jornalista: Hortencio Sanchez

Editór : Florencio Miranda Ximenes

iklan
iklan

Leave a Reply

iklan
error: Content is protected !!