POLÍTIKA

Deputada CNRT lamenta protokolu PA RAEOA impede serbisu jornalista

Deputada CNRT lamenta protokolu PA RAEOA impede serbisu jornalista

Deputada CNRT, Cedelizia Faria Dos Santos. Imajen Tatoli/Egas Cristóvão.

DILI, 05 juñu 2024 (TATOLI)—Deputada husi bankada CNRT iha Parlamentu Nasionál (PN), Cedelízia Farria dos Santos, lamenta ho aktu husi pesoál protokolu  Prezidente Autoridade Rejiaun Administrativa Espesiál Oé-Cusse Ambeno (RAEOA), ne’ebé impede serbisu jornalista Agência Tatoli iha RAEOA.

Notísia Relevante: AJTL-TLPU kondena protokolu PA RAEOA impede serbisu Jornalista

“Asuntu ne’e, ha’u mós akompaña tiha ona kona-ba hahalok ita-nia protokolu husi RAEOA nian. Ha’u sente lamentável tebes atetude hanesan ne’e, tanba jornalista ne’e nia iha liberdade atu halo kobertura ba área saida de’it, satán atividade ne’e relasiona ho Estadu nian, entaun protokolu laiha direitu atu ba taka fali dalan ba jornalista sira halo kobertura, satán ha’u haree informasaun nia dudu to’o jornalista ne’e monu ne’e, hanoin ida-ne’e lamentável tebe-tebes,” nia hateten ba Agência Tatoli iha resintu Parlamentu Nasionál, kuarta ne’e.

Foin dadaun ne’e, husi relatóriu ne’ebé mak fó sai hatudu katak Timor-Leste ninia ranking liberdade imprensa komesa tún ona, entaun loloos hadi’a ba oin hodi liberdade imprensa hadi’a fali ba normal, agora ho aktu sira-ne’ebé halo husi tékniku ka profisionál hanoin ne’e ba oin sei fó impaktu aat liu tán ba TL nia liberdade imprensa.

Tanba ne’e, Deputada husi bankada Governu husu ba oin aktu sira hanesan ne’e labele akontese tan, nune’e tenke respeita jornalista sira tanba bainhira halo atividade mak se sira la fó sai ba públiku ne’e ema hotu sei la hatene.

“Tanba ne’e, aktu ida-ne’e ha’u kontra no la konkorda, husu ha oin labele akontese tan ba sira,” nia lamenta.

Ho akontesimentu ne’e, nia apela atu aktu sira-ne’e labele akontese tan hasoru jornalista sira, tanba liberdade imprensa ne’ebé vigora ona la’ós de’it iha Timor-Leste maibé mundu tomak tanba direitu jornalista sira-ne’e asegura.

Enkuantu, iha 04 juñu tinan ne’e iha tuku 17h00 lorokraik, iha ótel Ambeno, iha serimónia asina akordu entre RAEOA ho Timor-Aid, atu estabelese muzeu  tais Timor iha Oé-Cusse, pesoál apoiu protokolu  Prezidente autoridade RAEOA, Aquito Roxaca Guteres, rasta no u jornalista Agência Tatoli destakadu iha RAEOA, Abílio Elo Nini, monu bainhira hala’o hela kobertura no pesoál ne’e tenta atu tuku tan jornalista ne’e.

Entretantu, antes ne’e mós membru Parlamentu Nasionál sira preokupa ho índise liberdade imprensa Timor-Leste nian iha tinan 2024 monu tun ba dá-20 husi tinan 2023 iha pozisaun 10 mundialmente.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!