EDUKASAUN, HEADLINE

KI: Hahalok husi protokolu PA RAEOA laiha étika

KI: Hahalok husi protokolu PA RAEOA laiha étika

Prezidente Konsellu Imprensa, Otélio Ote. Imajen Tatoli/Francisco Sony

DILI, 05 Juñu 2024 (TATOLI) – Prezidente Konsellu Imprensa (KI) Timor-Leste, Otélio Ote, preokupa ho hahalok ne’ebé pesoál protokolu Prezidente Autoridade Rejiaun Administrativa Espesiál Oé-Cusse Ambeno (RAEOA) halo hasoru jornalista Ajénsia Notisioza Timor-Leste Tatoli, Abílio Elo Nini, iha ámbitu serimónia asina memorandu entendimentu iha otél Ambeno, ne’e konsidera laiha étika.

Prezidente KI hateten relasiona ho vídeo ne’ebé publika iha rede sosiál kona-ba akontesimentu iha Oé-Cusse ne’e hatudu hahalok ne’ebé la di’ak, tanba serimónia asinatura entre PA RAEOA, Rogério Tiago Lobato, no reprezentante Timor Aid la’o hela no hetan mós partisipasaun husi Prezidente Repúblika, José Ramos Horta, no membru Governu balun.

“Ita triste tanba akontesimentu ne’e mosu bainhira serimónia la’o hela. Ita konsidera serimónia ne’e laiha liña koordenasaun no komunikasaun di’ak entre parte autoridade RAEOA no jornalista sira ne’ebé halo kobertura iha serimónia ne’e. Loloos, antes ne’e, sira tenke briefing ona jornalista sira kona-ba fatin atu hamriik hodi hasai foto no fatin atu halo kobertura hodi foti gravasaun”, Otélio Ote dehan ba Tatoli, iha Quintal Boot, ohin.

Nia salienta katak tanba komisaun la halo preparasaun di’ak ne’e maka jornalista sira mós la hatene sira-nia fatin atu hamriik hodi halo kobertura no ikus mai mosu problema ne’ebé ema hotu la imajina.

“Atu halo oinsá mós parte protokolu tenke tau nia aan hanesan ema ne’ebé serbisu iha instituisaun Estadu, tenke iha koñesimentu adekuadu atu orienta jornalista sira iha kualkér situasaun hodi tuir nafatin protokolu ne’ebé iha. Maibé, protokolu la hala’o ida ne’e maka mosu problema sira ne’e hotu”, realsa.

Prezidente Konsellu Imprensa konsidera katak tratamentu protokolu PA RAEOA nian hodi dada jornalista Tatoli monu ne’e hahalok ida la di’ak. “Loloos nia uza aprosimasaun familiár hodi konvida ho linguajen ne’ebé mamar atu jornalista sira bele entende hodi kumpre, maibé nia dada fali jornalista monu ne’e maka buat ida ita haree la di’ak. Hahalok hanesan ne’e tama ona iha asaun atu hapara jornalista nia atividade atu asesu ba informasaun”, nia lamenta.

Konsellu Imprensa sei serbisu hamutuk ho Sekretaria Estadu Komunikasaun Sosiál no asosiasaun jornalista sira atu disponibiliza formasaun hodi Divulga Lei Komunikasaun Sosiál ba ajénsia estadu, liña ministeriál sira ne’ebé serbisu iha área protokolu, nune’e bele hetan koñesimentu atu iha futuru labele akontese tan hahalok sira hanesan ne’e.

“Iha Lei Komunikasaun Sosiál, ajente Estadu ida halo atentadu ida hodi hapara atividade jornalístika nian ho asaun hadau sasán ruma ne’ebé jornalista uza hodi halo kobertura hanesan kámara no ekipamentu sira seluk ne’e hetan ameasa kastigu tinan tolu-resin. Maibé, tanba sira seidauk hetan kona-ba lei mídia nian ne’e maka sira seidauk komprende”, adianta.

Otélio Ote husu ba jornalista Tatoli ne’ebé hetan tratamentu la di’ak husi protokolu ne’e atu kontinua tau aan hanesan jornalista hodi prevene violénsia. “Tanba ema ida bainhira deside atu sai jornalista, nia tenke kumpre buat tolu maka vítima ba tempu, vítima ba materiál no sai mós vítima ba ita-nia isin rasik”, salienta.

Notísia relevante: Rogério Lobato sei suspende protokolu ne’ebé impede serbisu Jornalista

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!