COVALIMA, 05 Juñu 2024 (TATOLI) – Programa Nasionál Dezenvolvimentu Suku (PNDS) disponibiliza formasaun kona-ba lideransa ba estrutura Komisaun Planeamentu Akuntabilidade (KPA) iha postu no suku sira.
“Formasaun kona-ba oinsá lala’ok priense formuláriu iha terrenu no oinsá feto sira bele sai lideransa ida hodi organiza atividade ligada ho programa PNDS”, Administradór Postu Suai, Idelfonso Maria Amaral, dehan iha Tabakolot, ohin.
Formasaun ne’e ba estrutura KPA iha suku Suai Loro, Debos, Camnasa, Labarai no Beco husi postu administrativu Suai no feto sira ne’ebé lidera Ekipa Jestaun suku (EJS) hodi hasa’e sira-nia kõnesimentu kona-ba lala’ok implementasaun programa PNDS iha suku sira.
Fasilitadora Sosiál PNDS Suai, Bernadete de Jesus Inácia, dehan atividade ne’e parte ida atu hasa’e feto lideransa sira-nia abilidade iha prosesu implementasaun programa PNDS.
“Formasaun oinsá feto sira iha abilidade iha terrenu. Karik sira bele hatene sira-nia knaar ho di’ak hodi responde ba serbisu ne’ebé iha sira-nia suku no aldeia ligadu ba programa PNDS”, nia dehan.
Implementasaun programa PNDS ne’e feto sira mós envolve iha EJS, ne’ebé asume kargu nu’udar Prezidente Komisaun Planeamentu Akuntabilidade (KPA) no husi formasaun ne’e feto sira bele lidera prosesu tomak iha terrenu.
Prezidente KPA Suku Camnasa, Ana Maria Perreira, realsa Programa Dezenvolvimentu Suku presiza disponibiliza formasaun ba prezidente KPA ho nia estrutura ne’ebé durante ne’e envolve iha implementasaun programa PNDS.
“Presiza formasaun ne’ebé foku ba grupu feto, nune’e hasa’e ami-nia abilidade nune’e ami bele aplika iha komunidade, liuliu iha implementasaun programa PNDS” , hateten.
Jornalista: Celestina Teles
Editora: Maria Auxiliadora
