HEADLINE, INKLUZAUN SOSIÁL

SEI aprova ona matadalan implementasaun fundu transferénsia públika 2024

SEI aprova ona matadalan implementasaun fundu transferénsia públika 2024

Diretór Jerál SEI, Armando da Costa. Imajen Tatoli/Egas Cristóvão

DILI, 05 juñu 2024 (TATOLI)—Sekretaria Estadu ba Igualidade (SEI), tinan ne’e, aprova ona matadalan ba mekanizamu implementasaun fundu transferénsia públika tinan-2024 nian, ne’ebé atu hakbiit feto no grupu vulnerável sira iha munisípiu hotu.

“Foin lalais ami aprova filafali matadalan foun, hanesan guia ida ba ezekusaun fundu transferénsia públika ne’ebé tinan ne’e aloka mai hamutuk $300.000 atu hakbiit feto no grupu vulnerável sira atu halo negósiu liuhusi programa bolu fundu hadula ka rotativu,” Diretór Jerál SEI, Armando da Costa, informa ba Agência Tatoli, iha ninia knaar-fatin, Caicoli, kuarta ne’e.

Antes ne’e, SEI iha duni matadalan, maibé haree ba esperiénsia ho avaliasaun ba implementasaun fundu tranferénsia públika anteriór, entaun deside halo filafali revizaun matadalan ida hodi dezenvolve liután situasaun reál ba grupu benefisiáriu sira, nune’e mós parseiru sira ne’ebé durante ne’e kolabora ho SEI iha misaun igualdade no inkluzaun.

“Entaun, iha matadalan ida-ne’e ita ko’alia kona-ba mekanizmu osan ne’ebe sei apoiu ba grupu sira iha munisípiu to’o suku liuhusi mekanizmu hadulas ka rotativu, entaun tinan ne’e tuir planu sei apoia grupu feto hamutuk 75 to’o 100 hodi halo atividade negósiu,” nia akresenta.

Notísia relevante : MKAE-liña ministeriál reune konsolida konseitu iha faze pos-adezaun TL ba OMK

Área negósiu ne’e livre, depende ba benefisiáriu sira mak hili, ne’ebé kada grupu sei hetan $2.000.

Mekanizmu ba tinan ne’e sei serbisu hamutuk ho Prezidente Autoridade munisípiu sira ho Asosisaun Feto munisípiu sira ne’ebé sai hanesan parseiru SEI iha munisípiu hodi implementa fundu ne’ebé sei fó ba grupu sira.

Asosiasaun Feto sira mak sei haruka dadus mai SEI nasionál hodi halo verifikasaun hotu, nune’e SEI asina akordu ho Asosiasaun Feto hodi halo tranferénsia osan ba sira hodi apoiu ba grupu benefisiáriu sira.

SEI hahú fundu rotativu ne’e desde tinan-2019 to’o 2023, ne’ebé apoia ona grupu feto hamutuk 434 liuhusi fundu tranferénsia públiku $776.486.

Númeru grupu no montante orsamentu referidu fahe ba aplikasaun mekanizmu sira hanesan apoiu ho mekanizmu rotativu hamutuk grupu 344 ho montante orsamentu $636.146, apoiu ba grupu feto sira la’ós mekanizmu rotativu hamutuk 65 ho montante orsamentu $103.913 no apoiu ba grupu feto vulnerável hamutuk 25 ho montante orsamentu $36.427.

Tipu atividade ekonomia ne’ebé mak implementa husi grupu sira mak hanesan órtikultura, agrikultura, peska, hakiak ikan rai maran, hakiak animál manu, karau, fahi, bibi, pakotementu no prosesamentu ai-han, artezenatu homan, soru no kioske hodi hetan rendimentu.

Aleinde ne’e, apoiu mós atividade sira seluk hodi promove igualdade jéneru no empoderamentu feto. SEI nia intervensaun ne’e hakarak foku liubá grupu alvu sira-ne’ebé moris duni iha área rurál, ne’ebé susar asesu ba apoiu husi ajénsia finanseiru.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!