DILI, 06 juñu 2024 (TATOLI) – Ministériu Koordenadór asuntu Ekonómiku hala’o reuniaun koordenasaun interministeriál sira hodi konsolida konseitu no ideia iha faze pos-adezaun Timor-Leste (TL) nian ba Organizasaun Mundiál Komérsiu (OMK).
“Depois ita-nia Parlamentu Nasionál ratifika Pakote adezaun Timor-Leste nian ba OMK, ohin ami hamutuk ho liña interministeriál sira, ami konvoka reuniaun hodi haree servisu saida de’it mak mai atu priénse hodi servisu hamutuk ho OMK nian”, Vise Primeiru Minsitru no Ministru Koordenadór Asuntu Ekonómiku no Ministru Turizmu no Ambiente Francisco Kalbuadi Lay iha farol, ohin.
Iha fatin hanesan, Ministru Komérsiu no Indústria, Filipus Nino Pereira, afirma Timor-Leste iha pos-adezaun, tanba ne’e hosi komisaun inetrministariál ba OMK liuliu tékniku sira ne’ebé durante ne’e hala’o hela akompañamentu iha ne’e fó ideia ba malu oinsá bele servisu hamutuk ba oin.
“Iha nivel enkontru koordenasaun ida-ne’e atu haree fila-fali kada ministériu ninian preparasaun ba lei sira ne’ebé mak presiza no oinsá atu kompleta rekezitu balun ba pos-adezaun nian hamutuk 31, planu asaun lejislasaun nian, tanba ne’e mak ami haree katak ida-ne’e importante duni: ezemplu hanesan MCI ami iha lei tolu mak importante atu lori ba OMK”, Filipus Nino afirma.
Nia esplika, lei dahuluk mak ba kódigu propriedade ba industriál, daruak mak regra orijen nian no datoluk mak implementasaun planu asaun manufatura nian, entaun ida-ne’e Governu servisu di’ak, tanba iha lei balun presiza iha koordenasaun no liña ministeriál sira seluk.
“Tanba ne’e mak iha enkontru ida-ne’e fahe mós servisu ne’ebeé mak kada ministériu sira tenke halo hodi kompleta ita-nia planu asaun ba lejislasaun ninian”, nia konklui.
Partisipa iha reuniaun ne’e mak Ministériu Petróleu Minerais, Ministru Agrikultura, Perkuaria no Floresta, Sekretáriu Estadu Peskas, Ministru Asuntu Parlamentár, Vise Ministru Fortalesimentu Institusional, Vise Ministru Saúde ba Operasionalizasaun Ospitál, Ministru Komérsiu Indústria, Ministru Transporte no Telekomuniksaun, Banku Sentrál no Sekretáriu Estadu Kooperativa.
Jornalista : Felicidade Ximenes
Editór : Zezito Silva
