DILI, 05 juñu 2024 (TATOLI)—Sekretaria Estadu ba Iguladade (SEI), tinan ne’e, sei atribui ajudu ba Asosiasaun Feto sira iha munisípiu hodi halo kongresu feto munisipál, ne’ebé kada sempre realiza kada tinan-lima hodi hili fali estrutura no estatutu foun.
“Ita sei apoiu fundu ba Asosiasaun Feto iha munisípiu 12 inklui Rejiaun Administrativa Espesiál Oé-cusse Ambeno (RAEOA) hodi halo kongresu feto munisipál. Tuir planu fim de jullu hahú ona kongresu, signifika SEI halo movimentu ida ba munisípiu hotu,” Diretór Jerál SEI, Armando da Costa, informa ba Agência Tatoli, iha ninia knaar fatin, SEI Caicoli, kuarta ne’e.
SEI tinan ne’e prevee orsamentu iha kategoria transferénsia públika ho montante $300.000 hodi atribui ba grupu feto munisipál.
Notísia relevante : SEI distribui motorizada ba pontu vokál na’in-36
Husi orsamentu ne’e sei fahe ba asuntu barak, balun sei atribui ba programa Hadulas inklui sosiedade sivíl sira ne’ebé serbisu liga ho asuntu igualdade jéneru no apoia ba Asosiasaun Feto munisipál sira hodi halo kongresu.
“Tinan antes, ita apoia ba kongresu ne’e hamutuk $5.000 maibé ba tinan ne’e sei iha diskusaun nia laran, maibé orsamentu ne’ebé ita apoia ba kada asosiasaun ne’e ho montante hahú husi $4.000 to’o $5.000, depende ba sira-nia pedidu no haree mós situasaun ba populasaun iha munisípiu nian,” nia akresenta.
Atribuisaun ajudu ba Asoasiasaun Feto iha munisípiu sira ne’e importante tanba asosiasaun sira ne’e nu’udar parseria SEI iha munisípiu hotu ne’ebé ho serbisu prinsipál mak hanesan identifika feto potensiál sira hodi halo preprasaun formasaun ho parseiru sira, prepara feto sira partisipa iha vida polítika no foti desizaun, atividade seluk mak sai mahon ba feto sira iha munisípiu, hato’o sira-nia aspirasaun no hola parte iha atividade hanesan prevensaun violénsia kontra feto, labarik no seluk tan.
Jornalista : Arminda Fonseca
Editora : Julia Chatarina
