iklan

HEADLINE, KAPITÁL

SEI distribui motorizada ba pontu vokál na’in-36

SEI distribui motorizada ba pontu vokál na’in-36

Sekretária Estadu ba Igualdade, Elvina Sousa Carvalho, entrega simbolikamente xave motór ba Pontu Vokál, Julio Sarmento, iha resintu edifísiu SEI, Caicoli, tersa (04/06/2024). Imajen Tatoli/Arminda Fonseca

DILI, 04 juñu 2024 (TATOLI)–Sekretária Estadu ba Igualidade (SEI), tersa ne’e, halo distribuisaun motorizada hamutuk 36 ba pontu vokál na’in-36 husi postu administrativu sira iha munisípiu 12 inklui Rejiaun Administrativa Espesiál Oé-cusse Ambeno (RAEOA).

Sekretária Estadu ba Igualdade, Elvina Sousa Carvalho, hateten, atividade distribuisaun ne’ebé SEI halo nu’udar instituisaun Estadu ho nia papél atu koordena no halo advokasia ba abordajen integrada jéneru iha polítika, lei, programa no orsamentu, nune’e halo prevensaun no kombate violénsia bazeia ba jéneru, hakbiit ekonomia feto no hasa’e partisipasaun feto iha vida polítika no nível foti desizaun.

“Ohin ita halo distribuisaun motorizada ba ita-nia pontu vokál sira iha postu administrativu sira hodi fasilita sira-nia serbisu prinsipál sira iha terrenu hanesan promosaun igualdade inkluzaun, apoiu serbisu munisípiu nian liga ho igualdade jéneru, apoiu vítima bazeia ba jéneru no seluk tan,” Sekretária Estadu hateten iha ninia knaar fatin, Caicoli.

Notísia relevante : SEI no Sekretariadu ASEAN organiza formasaun redusaun pobreza relasaun ho igualdade jéneru

SEI iha tinan 2021 halo ona rekrutamentu ba pontu vokál postu administrativu iha munisípiu 12 hodi kompleta iha munisípiu 12 inklui Rejiaun Administrativa Espesiál Oé-cusse Ambeno (RAEOA) hodi halo serbisu SEI nian to’o iha baze tuir polítika IX Govemu Konstitusionál ne’ebé atribui mai iha SEI no portfóliu nian.

Atu fasilita sebisu pontu vokál postu administrativu sira nian, nune’e liuhusi Orsamentu Jerál Estadu (OJE) 2023 SEI nian, ho kategoria kapitál menór, ho fazeadamente prevee ona orsamentu hamutuk $63.000 hodi sosa motorizada hamutuk 36 ba pontu fokál postu sira iha faze dahuluk no sei kompleta tan iha faze daruak  iha tinan ida-ne’e.

Iha fatin hanesan, pontu vokál SEI husi postu Barique Natarbora munisípiu Manatuto, Florianca Carles, sente kontente hetan fasilidade tanba bele fasilita di’ak liután serbisu sira iha terrenu. Tanba dazafiu ne’ebé hasoru nu’udar pontu vokál mana komunidade menus koñesimentu liga ho asuntu igualdade jéneru, líder komunitáriu balun menus koñesimentu ba líder ne’e rasik.

“Husi dezafiu sira ne’e, ami nafatin halo advokasia ba parte relevante sira no kontinua halo sosializasaun ba komunidade liga ho violénsia oinsá komunidade bele iha koñesimentu ba asuntu sira ne’e. Sente kontente tebes hetan apoia motór husi SEI ida-ne’e fasilita tebes ha’u-nia serbisu hotu iha terrenu, hanesan halo monitorizasaun ba grupu benefisiáriu sira-ne’ebé hetan apoiu fundu husi SEI, kazu bazeia ba jéneru no seluk tan,” nia dehan.

Jornalista     : Arminda Fonseca 

Editora          : Julia Chatarina

iklan
iklan

Leave a Reply

iklan
error: Content is protected !!