DILI, 05 juñu 2024 (TATOLI)–Universidade Nasionál Timor-Lorosa’e (UNTL) , tinan ne’e, sei fó graduasaun ba estudante hamutuk 1.729 husi nível lisensiatura no doutoramentu.
“UNTL prepara hotu ona kondisaun, normalmente ita haree ba toga, trazes ne’ebé mak graduadu sira sei uza, to’o agora buat hotu prepara ona. Ita sei iha faze verifikasaun nia-laran ba lista sira ne’ebé ita submete ba Ministériu Ensinu Superiór Siénsia no Kultura (MESSK), ne’ebé verifika ita-nia dadus buat hotu loos ona entaun ita bele pronúnsia ona data ba graduasaun,” Reitór UNTL, João Martins, informa ba jornalista sira, iha salaun Komisaun Nasionál Eleisaun (CNE, sigla portugés), kuarta ne’e.
Diretor Nasional Atendimentu Estudantíl UNTL, Rui Lopo Pires, relata, estudante ne’ebé atu simu graduasaun ne’e kompostu husi feto 941 no mane 788, husi fakuldade sia.
Ba faze dahuluk nian ba grau lisensiatura hamutuk 1.716 no grau maestradu hamutuk 13.
“Graduasaun ba tinan ida-ne’e hamutuk 1.729 ne’e inklui ho doutoramentu 13 no reguler hamutuk 1.716 kompostu husi feto 936 no mane 780, no doutoramentu kompostu husi feto lima no mane ualu,” nia akresenta.
Notísia relevante : Vise-Reitor UNTL husu estudante la-ativu 9.255 atu halo reinskrisaun
Fakuldade sia mak hanesan Agrikultura iha graduadu 127, Enjeñária, Siénsia no Teknolojia 323, Edukasaun, Arte no Umanidade 521, Medisina no Siénsia Saúde 291, Ekonomia no Jestaun 94, Direitu 64, Siénsia Sosiál 200, Filosofia Siénsia Umana 52, Turizmo Arte Indústria Kreativa no Kulturál 44.
Vise-Reitor Asuntu Akadémiku no Garantia Kualidade UNTL, Samuel Venâncio de Sousa Freitas, informa, parte universidade prepara ona graduasaun iha Gináziu GMT.
“Graduasaun ba tinan ida-ne’e, tuir planu ita halo ba dala-rua, ba iha primeira faze ita prepara hotu ona kondisaun, normalmente ita haree ba toga, trazes ne’ebé mak gradua sira sei uza ne’e ate agora buat hotu prepara ona,” nia tenik.
Ba faze primeiru ne’e monu iha fulan-jullu no faze daruak ne’e monu iha fulan-dezembru. Nune’e, husu ba estudante graduadu sira ba faze primeiru atu hein tanba graduasaun ne’e fixu ona iha fulan-jullu nia laran ba segunda semana.
“Buat hotu loos ona no hein lista verifikasaun husi MESSK ne’e ita anúnsiu data fixu ba graduasaun,” nia reforsa.
Jornalista : Osória Marques
Editora : Julia Chatarina
