iklan

DESPORTU, HEADLINE

Vila Vista FC termina nia jornada ho derrota kontra UEP FC

Vila Vista FC termina nia jornada ho derrota kontra UEP FC

Jogu Futebol Kopa Maun Boot Kayrala Xanana Gusmão 2024, UEP FC kontra Vila Vista FC, iha estadiun Munisípal Dili, kuarta (05/06). Imajen Tatoli/Francisco Sony

DILI, 05 juñu 2024 (TATOLI) – Ekipa istimadu husi Suku Ulmera Postu Administrativu Bazartete Munisipiu Liquiça Vila Vista FC obtigadu tenke termina nia jogu ikus ho tristeza ne’ebé kauza husi derrota 2-3 kontra adversariu UEP FC, iha jogu faze grupu kopa Maun Boot Kay Rala Xanana Gusmão ne’ebé realiza iha Estádiu Munisipál Dili, kuarta loraik ne’e.

Bainhira jogu la’o ekipa rua lansa kedan kontra no atake ba malu tuir tékniku no abiliade ekipa idaidak nian tuir kultura futeból.

Vila Vista tenta halo presaun ne’ebé maka’as halo UEP book-aan la di’ak iha kampo laran. Ho presaun ne’ebé Vila Vista halo iha minutu 10 jogadór UEP halo erru iha lina oin UEP nian árbitru foti desizaun fó kedan penalidade ba Vila Vista ezekuta sutu livre, sutu livre ne’e lansa husi jogadór Armindo Quintão (4) bola tama liu rede laran muda rezultadu ba 1-0.

Jogu Futebol Kopa Maun Boot Kayrala Xanana Gusmão 2024, UEP FC kontra Vila Vista FC, iha estadiun Munisípal Dili, kuarta (05/06). Imajen Tatoli/Francisco Sony

Ho golu ne’e halo UEP tenke servisu maka’as liutan iha kampo laran. Servisu ne’ebé UEP halo la hela de’it hanesan servisu ikus iha minutu 14 jogadór Juvencio Soares responde golu ida muda rezultadu empata ba 1-1.

Maske jogu empata ona UEP nafatin haka’as aan iha kampo laran buka atu manán jogu ne’e. Vila Vista mós la fó fatin ikus to’o minutu primeira parte termina laiha ekipa ida mak prodús  golu rezultadu hela provijoriu 1-1.

Hakur ba segunda parte ekipa rua nafatin lansa kontra no atake ba malu ho velosiade ne’ebé maka’as. Vila Vista esforsu atu manán jogu ne’e maibé hatudu jogu ho profesionál hodi pasa bola ba mai iha kampo laran la ansi hatama golu bainhira tempu seidauk to’o.

UEP mós lakoi lakon hala’o jogu ho velosidade ne’ebé másimu maibé Vila Vista sempre hamate tutuir jogu ne’ebé UEP halo. Avansadu UEP Silveiro Garcia (10) lansa sutu barak maibé nunka kona iha alvu, sutu barak mós guarda rede salva.

Vila Vista nunka lakon esperansa, nafatin joga ho kalma, hatudu tékniku jogu ne’ebé adekuadu. Ikus esforsu hirak ne’e la hela de’it hanesan esforsu tanba jogadór Ludivinho Gama (5) lansa golu ida muda rezultadu ba 2-1 iha minutu 49.

Golu ne’e halo UEP nia fuan taridu, muda estratejia jogu oioin maibé seidauk bele halo golu tanba defeza Vila Vista la fó fatin ba UEP tama tuir nia hakarak.

Maibé UEP la lakon esperansa, nafatin hatudu jogu nune’e iha minutu 65 jogadór Jaimito Soares (6) responde ona golu ida muda rezultadu empata 2-2. Golu ne’e hasa’e liutan UEP nia velosidade jogu ho nune’e iha minutu 75 Silveiro Garcia (10) responde tan golu ikus muda rezultadu ba 3-2.

Golu ne’e fó kedan derrota ba Vila Vista nune’e UEP rekolla kedan lontu tolu. Jogu la’o to’o minutu normal termina laiha tan golu ruma akontese nune’e vitoria prega metin ba UEP.

Vitoria ne’e lori UEP lidera metin tabela klasifikasaun grupu E ho pontu sia no Aimou FC okupa iha pozisaun segundu ho pontu neen no ekipa rua ne’e konfirmadu ultrapasa ona ba 16 finál no ekipa rua seluk hanesan Laivai FC hetan de’it pontu tolu no Vila Vista FC pontu zero labele ultrapasa ona ba oin tenke elemina.

Notisia relevante:Coach Eleven ‘tebe sai’ Naimeco FC ho rezultadu 4-1 iha kopa Xanana

Jornalista: Hortencio Sachez

Editór     : Florencio Miranda Ximenes

iklan
iklan

Leave a Reply

iklan
error: Content is protected !!