DILI, 06 juñu 2024 (TATOLI)—Komisáriu Ezekutivu Servisu Korporativu Eletrisidade de Timor-Leste, Empreza Públika (EDTL, E.P), Júlio de Jesus, anúnsia ona totál konta eletrisidade ne’ebé ajénsia Governu seidauk selu.
“Ajénsia Governu hamutuk 49 ne’ebé kompostu husi edifísiu Ministeriu, Parlamentu Nasionál, Tribunál, Munisípiu, instituisaun publika, no empreza públika sira seidauk halo pagamentu ba eletrisidade ho montante millaun $27,” Komisáriu Júlio informa liuhusi konferénsia imprensa, iha edifísiu EDTL, Caicoli, kinta ne’e.
Notísia relevante : Deputadu CNRT husu EDTL, E.P kontrola kliente dada ahí ilegál
EDTL desde novembru 2023 fó ona notifikasaun no iha janeiru tinan ne’e halo mós sorumutu ida ho ajénsia Governu sira, nune’e to’o agora balun selu ona enkuantu seluk seidauk.
Tuir dadus, iha juñu 2023, ajénsia Governu nia konta to’o $29.591.574,62 no to’o abríl 2024 rejista ona millaun $27.
“Ita fó karta notifikasaun fulan-fulan. Ami sei fó avizu ikus no aban ami sei fó karta notifikasaun, se la selu iha fulan-juñu ne’e, iha inísiu fulan-jullu ami sei tun kedas atu hasai eletrisidade ba ajénsia sira-ne’e,” nia alerta.
Biban ne’e, Komisáriu EDTL, E.P rekoñese katak ministériu no ajénsia barak la konsege selu tanba laiha osan, maibé EDTL nu’udar empreza públika tenke hala’o ninia serbisu atu hetan rendimentu Estadu nian.
Jornalista : Osória Marques
Editora : Julia Chatarina
