VIQUEQUE, 05 juñu 2024 (TATOLI)-Xefe Aldeia Mea-Uai, Suku Uaimori, Postu Administrativu Viqueque, munisípiu Viqueque, Agusto Soares, husu ba Governu liuhusi Ministru Obra Publiku atu hadia estrada ba sira nia aldeia tanba kondisaun grave tebes.
“Ho kondisaun estrada ida-ne’e hamate ita-nia abitante sira, hodi lori sira-nia produtu lokál ba merkadu. Abitante sira, maiória moris ho vida agrikultór. Maibé, kondisaun dalan mak aat tahu nakonu iha dalan no dalan balun kotu ne’ebé karreta labele asesu bá ami- nia aldeia”, Agusto Soares, ba Agência TATOLI,I.P, iha aldeia Mea-Uai, ohin.
Nia dehan ho kondisaun estrada grave ne’e difikulta movimentu ema no trasporte, nune’e abitante sira tenke la’o ain kuaze kilométru sia, hafoin asesu merkadu no sentru fasilidade saude.
Kondisaun estrada aat ne’e, nia dehan kuaze tinan barak ona, maibé seidauk halo normalizasaun, nune’e husu ba Governu liu husi Minitériu Obra Públiku (MOP) atutau matan ba estrada.
Komunidade Mea-Uai iha produtu lokál hanesan Ai-farina, fehuk, modo no batar ne’ebé komunidade aldeia referidu prodús hodi uza ba konsumu no balun faan faan hodi sustenta familia.
Hatan ba kestaun ne’e, Prezidente Autoridade Munisípiu Viqueque, Francisco C.S de Gonzaga Soares, hateten, mandatu ida-ne’e infraestutura sira hanesan estrada no ponte sai perioridade atu komunidade sira bele asesu no lori sira-nia produtu lokál asesu ba merkadu sira.
“Iha ami-nia mandatu infraestura ami tau perioridade tanba ida-ne’e halo konetividade ba komunidade sira-nia movimentu asesu ba merkadu sira seluk tán. Maibé, ami haree kuandu kustu boot liu ami-nia kbiit, ami sei buka dalan hodi husu Ministériu sira ajuda ajuda, ami responde ne’ebé ami nafatin halo kolaborasaun ho ministériu hodi haree mós asuntu infraestrutura liuliu estrada, eletrisidade no bee-moos”, nia promete.
Tuir obsevasaun jornalista Agência TATOLI,I.P nota katak kondiasaun dalan laiha bareira, dalan nakonu ho tahu no kuak barak, ponte kotu ne’ebé sai difikuldade ba abitante sira-nia movimentu entre aldeia ba postu Viqueque Vila.
Entretantu, iha área Bubur Lara kompostu husi suku Uaimori aldeia Mea-Uai ho totál abitante 259 totál uma-kain 62 no abitante husi suku Loi-Hunu ho totál abitante 400 resin no totál Uma-Kain 72.
Notisia relevante:Estrada nakonu ho tahu, Autoridade Bahatata husu MOP normaliza hodi fasilita movimentu ema-transporte
Jornalista: Vitorino Lopes da Costa
Editór : Florencio Mirinda Ximenes
