iklan

NASIONÁL, HEADLINE

EDTL garante tinan ne’e suku iha territóriu tomak bele asesu eletrisidade

EDTL garante tinan ne’e suku iha territóriu tomak bele asesu eletrisidade

Komisáriu Ezekutivu Servisu Korporativu EDTL, E.P, Júlio de Jesus Gonçalves. Imajen Tatoli/Cidália Fátima

DILI, 06 juñu 2024 (TATOLI)—Komisáriu Ezekutivu Servisu Korporativu Eletricidade de Timor-Leste, Empreza Públika (EDTL, E.P), Júlio de Jesus Gonçalves, garante katak tinan ida-ne’e suku 452 iha territóriu tomak bele asesu ona eletrisidade.

“Ita fahe ba nível suku 99% asesu hotu ona no só falta suku ida de’it mak seidauk tama. Ida-ne’e mós aldeia rua ka tolu de’it. Ida-ne’e iha nível suku 99% ona. Tinan ida-ne’e finál ona. Tinan ne’e ita garante 100%, rásiu asesu nível suku loos ona, agora iha nível aldeia ita tenke rekoñese foin mak 94%,” Komisáriu Ezekutivu informa liuhusi konferénsia imprensa, iha edifísiu EDTL, Caicoli, kinta ne’e.

EDTL nia esforsu atu alkansa asesu ba eletrisidade iha territóriu tomak, liuhusi programa eletrisidade nasionál rua, hanesan husi kolaborasaun ho empreza privada sira (konkursu públiku) no programa eletrisidade komunitária ne’ebé hala’o husi EDTL rasik ho distánsia ligasaun eletrisidade kilómetru ida to’o lima.

“Iha aldeia balun ita fó solár panél, ezemplu uma-kain haat ka lima iha foho leten mak ita dada liña eletresidade iha ne’ebá, siginifika todan oituan, entaun ita fó solár panél ba sira,” nia akresenta.

Notísia relevante : Populasaun aldeia Sana-Uatulari seidauk asesu eletrisidade

To’o ohin loron, solár panél unidade 1.090 mak fahe ona iha rai-laran tomak, ne’ebé programa ne’e sei hala’o hela no ekipa téknika EDTL mós hala’o ho ativu identifikasaun.

Júlio de Jesus rekoñese katak falta eletrisidade dala barak akontese tanba buat rua hanesan dezastre naturál no erru tékniku ka erru umanu, hanesan tesi ai-hun ne’ebé la konsidera kondisaun sira hodi hamosu problema ba kabu eletrisidade no problema sira seluk.

EDTL husi janeiru to’o maiu 2024 rekolla reseita millaun $23 husi fa’an eletrisidade, aluga eletrisidade no servisu seluk tan.

To’o fevereiru tinan ne’e, iha aldeia 310 ho suku neen mak seidauk enerjia eletrisidade, ne’ebé suu sira ne’ebé seidauk iha prosesu nia laran. Suku sira ne’ebé seidauk asesu ahi eletrisidade mak hanesan suku Petulau, postu administrativu Remexiu (Aileu) daudaun halo re-konkursu projetu, suku Makadade (Ataúro), suku Fahilebu (Liquiçá), suku Urahou no Manusae (Ermera), no ikus liu suku Goulolo (Bobonaro), ne’ebé fatin hirak ne’e instalasaun sei la’o hela.

Aldeia sira ne’ebé seidauk asesu maka hanesan 120 daudaun ne’e dezeñu no Bill of Quantity (BoQ) finaliza ona no hein publika sai, aldeia 76 dezeñu la’o hela, aldeia 79 seidauk halo levantamentu, no aldeia 35 prosesu konstrusaun la’o hela.

Iha parte seluk, EDTL, E.P monta ona kontadór pre-pagu 103.648, kompostu hosi monofáziku 102.269, trifáziku normál 1.307, AMC DC unidade 32, AMR CT unidade 27 no panel AMR unidade 13.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!