Funsionáriu feto iha UNTL besik-40% asume kargu diresaun no xefia

DILI, 26 juñu 2024 (TATOLI) –Husi totál pozisaun 74 iha Universidade Nasionál Timor Lorosa’e (UNTL) feto hamutuk na’in-29 ekivale 39,2% ka besik 40% mak asume kargu iha diresaun no xefia sira.

Dadus ida-ne’e fó-sai husi Diresaun nasionál rekursu umanu UNTL, Diretór Cancio Monteiro, tuir nota husi media UNTL ba Agência TATOLI, ohin.

“Iha UNTL, partisipasaun feto nian ba kargu xefia iha diresaun no departamentu sira, hamutuk 39,2% husi totál 74 pozisaun (diretór jerál to’o xefe seksaun) ne’e feto mak lidera. Enkuantu mane hamutuk na’in-haatnulu resin ida (44) reprezenta 60,8%,” ezekutivu ne’e relata iha Kampus Sentrál, UNTL, Dili.

Diretór haktuir, bazeia ba dadus tuir mapa pesoál ba tinan-2024-2025 nian rejistu partisipasaun feto ba iha kargu diresaun nasionál nian lidera husi feto na’in-tolu (diresaun hamutuk sanulu resin tolu), no kargu xefia totál hitunulu-resin haat (74) husi ne’e partisipasaun feto na’in 29 mak lidera hanesan xefe departamentu no xefe sesaun.

Aleinde funsionáriu, nia esplika, kargu xefia ne’ebé okupa husi dosente, hamutuk atus ida limanulu resin lima (155), no partisipasaun feto hamutuk limanulu resin haat (54) ne’e ekivale ho 35%.

Iha sorin seluk, Xefe departamentu rejistu alunu no sistema akadémiku, Matilde Reis hateten, nu’udar feto ida iha karreira ne’ebé asume hela kargu sente orgullu tebes, tanba ida-ne’e foin ba dahuluk manan ba vaga hodi lidera departamentu no iha mós hanoin katak to’o ona tempu atu oportunidade ba feto mós bele lidera.

“Ha’u Sente orgullu tebes, ba ha’u-nia aan rasik no ha’u mós hakarak enkoraja feto maluk sira seluk hodi hatudu ba katak, feto mós bele sai dirijente atu lidera iha diresaun no departamentu sira,” Matilde Reis enkoraja.

“Ha’u husu ba feto maluk sira hotu kuandu ba iha opurtunidade atu kompete di’ak liu kompete no brani atu foti desizaun, tanba ita iha lei ne’ebé bele regula ita hotu nu’udar funsionáriu públiku,’’ nia reiteira.

Entretantu, tuir dadus Sekretáriu Estadu Igualdade (SEI), feto asume kargu importante sira: a) 36,9% iha Parlamentu Nasionál no Feto dahuluk asume kargu hanesan Prezidente Parlamentu Nasionál iha Lejislasaun Dalima; b) Feto iha membru Governu na’in-ualu (17%) no Feto iha Xefe suku 4% no Xefe aldeia 5%.

Notísia relevante:Expedito husu mídia promove notísia sira kona-ba susesu feto nian 

Tatoli