DESPORTU, HEADLINE

ETO no RTTL, E.P koopera hodi halo tranzmisaun direta ba Kopa Europa 2024

ETO no RTTL, E.P koopera hodi halo tranzmisaun direta ba Kopa Europa 2024

Sekretáriu Estadu Komunikasaun Sosiál, Expedito Dias Ximenes, Prezidente RTTL, E.P, José António Belo ‘Taraleu’ no Tékniku Eto Telko, Edmundo Freitas Lopes, hala'o konferénsia imprensa relasiona ho asinatura memorandu entendimentu kona-ba trazmisaun direta 𝐊𝐨𝐩𝐚 𝐄𝐮𝐫𝐨𝐩𝐚 𝟐𝟎𝟐𝟒, iha Palásiu Governu, sesta (07/06). Imajen Tatoli/Francisco Sony

DILI, 07 Juñu 2024 (TATOLI) – Prezidente Rádiu Televizaun Timor-Leste (RTTL, E.P), José António Belo ‘Taraleu’, no  Diretór empreza Esperansa Timor Oan (ETO), Jacinto Moro, asina memorandu entendimentu (MoU) hodi serbisu hamutuk durante fulan ida, entre loron 15 Juñu no 15 Jullu, halo tranzmisaun direta ba Kopa Europa 2024 ba populasaun sira iha Timor-Leste.

Asinatura akordu ne’e hetan testemuña husi Sekretáriu Estadu Komunikasaun Sosiál (SEKOMS), Expedito Dias Ximenes, ne’ebé realiza iha Palásiu Governu.

“Ita hotu hatene katak kompañia ETO Telcom iha mós televizaun streaming ida. Iha biban ida ne’e, ETO maka sai manán-na’in hodi kompete ho kompañia sira iha ázia. Kompetisaun ne’e realiza iha Singapura hodi hetan direitu ba tranzmisaun Kopa Euro 2024, maibé ita-nia parseiru ETO Telcom hakarak serbisu hamutuk ho RTTL, E.P hodi tranzmite fali jogu ne’e ba ita-nia populasaun sira”, Expedito Ximenes informa iha ámbitu asinatura, ohin.

Sekretáriu Estadu agradese ba empreza ETO, tanba sira hasai tiha ona osan barak hodi hetan direitu ida ne’e, maibé sira mós hakarak serbisu hamutuk ho RTTL no Governu, liuhusi SEKOMS tranzmite jogu ida ne’e ba públiku tomak. Tanba ne’e, SEKOMS garante katak RTTL sei apoia hodi tranzmite jogu hamutuk 51 husi grupu lima ne’e hotu ba populasaun sira iha país.

Governu fó apoia tomak ba tranzmisaun ida ne’e tanba hakarak fó divertimentu di’ak ida ba populasaun sira, liuliu ba joven sira ne’ebé maka iha talentu ba desportu.

“Daudaun, ita-nia situasaun la’o hakmatek, ita presiza hetan divertimentu ruma liuhusi múzika no desportu. Ha’u hein katak ho atividade Kopa Europa ida ne’e populasaun bele asiste ho gratuita no la presiza sosa ona receiver ne’ebé fa’an iha loja sira ho folin ne’ebé karun, maibé bele asiste ona liuhusi televizaun sira ho telestriál katak la uza satélite”, salienta.

Iha fatin hanesan, Diretór ETO Telcom, Jacinto Moro, dehan asinatura ida ne’e sai previléjiu boot ida tanba ETO bele serbisu hamutuk ho RTTL atu tranzmite Kopa Euro 2024 ba populasaun sira iha territóriu.

“Ita halo akordu ida ne’e ho RTTL atu ita bele apoia malu iha tranzmisaun jogu ne’e, atu ita-ninia komunidade iha área rurál bele hetan asesu ho forma gratuita ba jogu Kopa Euro 2024 ne’e. Ida ne’e onra boot ida no sai momentu espesiál tebes ba ETO Telcom iha tinan ida ne’e, tanba bele halo kooperasaun di’ak ho RTTL”, salienta.

Prezidente Konsellu Administrasaun RTTL, E.P, José António Belo ‘Taraleu’. Imajen TATOLI/Francisco Sony

Iha sorin seluk, Prezidente RTTL, E.P, José Belo, afirma katak RTTL hanesan mídia estatál iha responsabilidade tuir kontratu ne’ebé iha atu promove no anima públiku sira liuhusi programa desportu nian.

Tanba ne’e, bazeia ba kontratu ne’ebé iha, RTTL tenke asume nia responsabilidade hodi fó apoiu tomak ba SEKOMS ninia planu. “Ba atividade ne’e rasik, RTTL la prevee orsamentu iha 2024, maibé RTTL bele hetan apoiu fundu husi Governu, liuhusi direitu sub-kontratu ho ETO Telcom”.

Prezidente ne’e salienta katak ETO Telcom nu’udar mídia ne’ebé hetan direitu ba tranzmisaun Kopa Euro.

Kopa Euro 2024 komesa iha loron 14 Juñu (tuir oras lokál fatin jogu hahú no  Timor-Leste iha 15 Jullu), iha Allianz Arena, iha Munique, no termina iha Estádiu Olímpiku Berlin fulan ida depois, iha 14 Jullu (tuir oras lokál).

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!