EKONOMIA, HEADLINE, MUNISÍPIU, OÉ-CUSSE (RAEOA)

EUA-TL lansa projetu CRITICAL atu hasa’e reziliénsia komunidade ba mudansa klimátika

EUA-TL lansa projetu CRITICAL atu hasa’e reziliénsia komunidade ba mudansa klimátika

EUA-TL lansa projetu CRITIKAL, hasa'e reziliénsia komunidade ba mudansa klimátika. Imajen mídia Sekretaria Rejionál Agrikultura.

OÉ-CUSSE, 06 juñu 2024 (TATOLI) – Ajénsia Dezenvolvimentu Internasionál Estadu Unida Amérika (EUA) ba Dezenvolvimentu Internasionál (USAID, sigla inglés), tersa ne’e lansa programa Redusaun Risku Klimátiku iha Indonézia no Timor-Leste (CRITICAL) Iha Rejiaun Administrativa Espesiál Oé-Cusse Ambeno (RAEOA).

Nota imprensa ne’ebé Agência TATOLI, asesu, kuarta ne’e, katak lansamentu ne’e ho durasaun tinan haat, sei implementa husi World Neighbors (WN) ho kolaborasaun husi Ministériu Agrikultura, Pekuária, Peska no Floresta, ho objetivu atu hametin reziliénsia komunidade kontra mudansa klimátika no impaktu sira selasiona ho dezastre.

“Programa CRITICAL ho fundu millaun $6.6 husi USAID ne’e, sei kobre Timor-Leste no Indonézia husi 2024 to’o 2028, ami-nia objetivu mak atu hadi’ak estratéjia efetivu ba redusaun risku klimátiku atu aumenta produtividade agríkola, protesaun kontra peste no moras, no reziliénsia peska lokál,” Diretór Interinu USAID iha Timor-Leste, Mark White.

Notísia relevante: WN tulun grupu feto 27 Oé-Cusse kuda hortikultura hadi’a rendimentu família

Iha komunikadu imprensa ne’e, esplika, programa CRITICAL inklui intervensaun abrajente ida ba kapasitasaun mak hanesan formasaun konaba jestaun bee ba halo to’os, konsérvasaun agrikultura, agrofloresta, no promove aihoris ne’ebé reziliénte kontra bailoron naruk, liu-liu Sorghum.

Intervensaun seluk inklui jestaun integradu kontra pesti ne’ebé lidera husi to’os na’insira no teknolojía dijitál klimátiku no preparasaun ba dezastre ba to’os-na’in no peskadór sira.

“Projetu ida-ne’e ninia objetivu atu benefísia diretamente komunidade vulnerável sira, iha área rurál, alvu iha Timor-Leste no Indonézia ho aumenta produsaun agríkola ba ema 69.200, fornesimentu bee, saneamentu, no ijiene ba ema 19.200, no apoia rekuperasaun ekonómika no sistema merkadu ba ema 4.485,” nota imprensa ne’e hateten.

Purtantu, fundu ba programa CRITICAL ne’e fornese husi USAID liuhosi Eskritóriu Apoiu Umanitáriu (sigla ingles, BHA), ne’ebé reflete kompromisu Governu EUA nian atu investe iha dezenvolvimentu ekonómiku sustentável no seguransa ai-han Timor-Leste nian.

“Kona ba USAID, liuhusi Embaixada EUA ba Timor-Leste kontribui ona osan hamutuk millaun $92 entre 2021 no 2025, hodi hadi’a ekonomia Timor-Leste nian no promove governasaun di’ak, no dezde restaurasaun independénsia Timor-Leste, USAID kontribui ona millaun $323-resin hodi promove dezenvolvimentu inkluzivu pasífiku atu nasaun ne’e prósperu, saudável no auto-sufisiente,” komunikadu ne’e relata.

Notísia relevante: Grupu feto RAEOA kuda produtu lokál hasa’e rendimentu família

Eventu ne’e partisipa husi Prezidente Autoridade RAEOA, Rogério Tiago Lobato, Diretór Jerál ba Agro-Komérsiu, Seguransa Ai-haan, no Unidade Kooperasaun husi Ministériu Agrikultura Pekuária, Peska no Floresta, Kate Schecter.

Nune’e mós Prezidente no CEO husi World Neighbors (WN) Edd Wright nu’udar mós Diretór Rejionál World Neighbors ba Sudeste Aziátiku no representante sira husi Ministériu Governu Timor-Leste nian no organizasaun lokál sira.

Jornalista   : Abílio Elo Nini

Editór          : Evaristo Soares Martins

iklan
iklan

Leave a Reply

iklan
error: Content is protected !!