DILI, 07 juñu 2024 (TATOLI)–Fundasaun ASSA, sesta ne’e, fahe koñesimentu kona-ba servisu kuidadu ba ema ferik no katuas sira, ba joven no estudante univertáriu sira iha salaun Hospitál Nasionál Guido Valadares (HNGV).
Notísia Relevante: Fundasaun ASSA fahe sertifikadu ba formandu lian inglés na’in 30
“Hasa’e koñesimentu joven sira, liuliu estudante joven sira atu iha hanoin no abilidade kona-ba kuidadu ferik no katuas sira. Semináriu ne’e bele ajuda sira oinsá responde merkadu de traballu iha rai-li’ur ninian,” Diretór Ezekutivu Fundasaun ASSA, Bendito Soares, hateten ba Agência Tatoli ba jornalista sira hafoin semináriu ho tema “Empoderamentu abilidade joven iha setór saúde, kuidadu ferik-katuas ne’e vantajen di’ak ba kontribuisaun merkadu sosiu ekonomia Estadu Timor-Leste nian,” iha HNGV, Bidau.
Nia esplika, Fundasaun ASSA partilla kompeténsia sira hanesan kuidade hahan ba ema ferik no katuas sira, kuidadu sira-nia moras no tratamentu dignu ba ema moras no Fundasaun ASSA mos fó formasaun abilidade iha lingua ingles ba joven sira.
Diretór ne’e hateten, ema tama ona ho idade 65 ba leten tama ona ba idade ferik no katuas, ne’eduni presiza iha kuidadu sira.
Nia hateten, joven liu 100 hosi Universidade sira hanesan Universidade Nasionál Timor Lorosa’e, Institutu Ciénsia Saúde no Universidade Dili mak partisipa iha semináriu hodi bele hatene kona-ba oinsá kuidadu bele kuidadu ba ema ferik no katuas.
Jerente ne’e garante, Fundasaun ASSA sei reforsa kooperasaun ho Sekretária de Estadu ba Formasaun Profionál no Empregu atu halo kooperasaun ho Embaixada Austrália atu bele haruka joven sira ba servisu iha Austrália.
Iha fatin hanesan, joven estudante husi Institutu Ciénsia Saúde, Adão Alves dos Reis, hateten semináriu ne’e importante hodi oinsá hatene kona-ba kuidadu ba ferik no katuas sira-ne’e.
“Nia objetivu ne’e mak fó tratamentu ida-ne’ebé kualidade, konfortável, saudável no dignu atu bele iha esperansa vida ka vida naruk ba ferik no katuas sira,” nia hateten.
Estudante ne’e dehan, introdusaun sira hanesan ne’e bele ajuda joven sira oinsá ba futuru bele kontribui di’ak ba nasaun.
Fundasaun ASSA koñesidu ho naran ASSA ne’e hanesan organizasaun Sosiedade Sivil ida ne’ebé mak oferese servisu iha área sepesializada mak desportu no Edukasaun iha Timor-Leste.
Jornalista : Jesuína Xavier
Editór : Cancio Ximenes
