COVALIMA 07 Junu 2024 (TATOLI) – Ema hamutuk 546 tenke retira husi nia hela fatin tanba inundasun ne’ebé akontese iha Suai Loro, munisípiu Covalima, informa Sekretáriu Munisipál ba Asuntu Sosiál no Organizasaun, Filomeno Cardoso.
Vítima sira ne’e daudaun Komisaun Jestaun Risku ba Dezastre Naturál Covalima realoka ona bá Sentru Evakuasaun Dezastre Naturál, iha Eskola Sekundária Jerál Públiku Suai.
Komisaun ne’e kompostu husi Servisu Munisipál, Autoridade Protesaun Sivíl (APC) no Sentru Solidariedade Sosiál ho nia parseiru sira hanesan Cruz Vermelha Timor-Lesste (CVTL), WFP, Care International, World Vision no Mercy Corps.
“Ita halo evakuasaun [ba uma] vítima dezastre naturál ho tipu inundasaun mai iha sentru evakuasaun hodi hela provizóriu hafoin bee tuun ona mak ita bele lori sira fila bá idaidak nia hela fatin”, Filomeno Cardoso hateten, ohin.
Inundasaun ne’e akontese tanba udan-boot ne’ebé tau halo volume bee sa’e no konstrusaun medida valeta ki’ik, nune’e bainhira udan hamosu inundasaun hodi afeta ba komunidade sira.
Autoridade ne’e dehan atu rezolve problema inundasaun iha Covalima presiza atu haree konstrusaun ba valeta sira hodi bele akumula bee.
Vítima dezastre naturál, Mário Nahak, rekomenda ba Governu hadi’a valeta iha Aldeia Akar-Laran, Sukabilar no Camanasa, nune’e bainhira tempu udan labele hamosu inundasaun hodi prejudika fali komunidade.
“Presiza atu hadi’a konstrusaun valeta ne’ebé ki’ik, nune’e rezolve problema inundasaun. Sé Governu la rezolve, entaun kada tinan sempre mosu dezastre naturál ho tipu inundasaun”, nia fó hanoin.
Notísia relevante: Prezidente ANATL observa direta kondisaun aeroportu Suai
Jornalista: Celestina Teles
Editora: Maria Auxiliadora
