DILI, 07 juñu 2024 (TATOLI)–Igreja Katólika Timor-Leste lansa rejistu online ba servisu voluntáriu Hadomi no Servi ba preparasaun vizita Amu Papa Francisco mai vizita Timor-Leste iha loron 09 to’o 11 setembru tinan 2024 ne’e.
Igreja katólika sei rekruta ema hamutuk 1000 ba servisu voluntáriu liu aplikasaun sira ne’ebé disponível ba sarani joven no kaben na’in sira iha on line mak hanesan: https://docs.google.com/forms/d/e/1FAlpQLScj9ouZr8KE8fllt5psRgBV3lpVMWpSXQWvr0sA/viewform?usp=sflink;
Facebook: https://www.instagram.com/voluntariuvizitasaunpapa?igsh=OGQ5ZDc2ODk2ZA
Instagram: http://www.instagram.com/voluntariovizitasaunpapa?igsh=OGQ5ZDc2ODk2ZA
Kordenador Jerál Ekipa Voluntáriu ba Hadomi no Servi, Padre Carlito da Costa Araújo, O’Carm, hatete sistema ne’e disponível atu simu sarani voluntáriu sira to’o taka bainhira ema atinje ona númeru rihun ida-ne’e.
Padre esplika, servisu voluntariu ne’e disponivel ba joven no kaben-na’in sira ne’ebé iha espíritu joven, espíritu atu serbí uma kreda liuhosi eventu sira-ne’ebé ita sei hala’o durante to’o Papa Francisco mai vizita Timor-Leste.
Nia hateten, voluntáriu sira sei tuir formasaun no objetivu prinsipál husi voluntáriu sira mak ajuda organiza no realiza atividade sira-ne´ebé kreda nian nakait ho Papa Francisco mai vizita Timor-Leste no garante vizita Estadu no pastorál ne’e bele la’o ho di’ak.
“Rejistu on line ne’e funsiona hahu ohin. Objetivu prinsipál hosi voluntáriu sira mak ajuda organiza no realiza atividades sira ne’ebé kreda nia ligadu ho sua santidade Papa nia vizita mai Timor-Leste,” Koordenadór Jerál Ekipa Voluntáriu ba Hadomi no Servi, Padre Carlito da Costa Araújo, O’Carm, hateten ba jornalista sira liuhosi konferénsia imprensa, iha Kámara Arquidioseze Dili, Lecidere, sesta ne’e.
Saserdote ne’e mos husu atu joven feto no-mane no kaben na’in sira atu hola parte iha eventu santu ida-ne’e.
“Mai ita hatudu ita nia kompromisu nu’udar sarani katólika no fiar-na’in liuhusi serbisu voluntarizmu ninian,” nia dehan.
Iha fatin hanesan, Irmaun Nico Lay, hato’o rekezitu sira ba kandidatu ema servisu vuluntáriu mak hanesan ema joven ho espíritu joven no ativa iha parokia ka dioseze, idade 18 to’o 45, abiliadade komunikasaun di’ak, nomentalidade atu servi, iha koñesimentu kona-ba lingua hanesan Tetun, Ingles no Portuges no seluk tan no anexu dokmentu balun.
Nico Lay hato’o, proseseu mak hanesan rejistu, parsitipasaun no formasaun moral espirituál no umanu.
Jornalista : Jesuína Xavier´
Editór : Cancio Ximenes
