MUNISÍPIU, VIQUEQUE

PAM Viqueque ho ekipa SEATOU halo identifikasaun ba abitante okupa espasu públiku

PAM Viqueque ho ekipa SEATOU halo identifikasaun ba abitante okupa espasu públiku

PAM Viqueque-ekipa SETOU hahú identifika fatin públiku sira iha kapitál Viqueque. Imajén Tatoli/Vitorino Lopes da Costa

VIQUEQUE, 07 juñu 2024 (TATOLI)- Autoridade Munisípiu Viqueque hamutuk ho ekipa Sekretáriu Estadu Asuntu Toponomia no Urbana (SETOU), sesta ne’e, tu’un direta hodi halo observasaun no identifikasaun ba abitante sira-ne’ebé okupa espasu públika hodi halo negosiu iha kapitál Viqueque.

Hafoin halo indetifikasaun, Diretór Jerál Toponomia, Maria Odete Barros Florindo, informa PAM Viqueque mak konvida ekipa atu mai observa ka haree direta ba abitante sira-ne’ebé hala’o atividade negosiu ne’ebé okupa ba fatin espasu públiku.

“Ami foin tu’un direta ba área sira-ne’ebé abitante sira okupa espasu públiku hanesan parte Beloi-Mota ninin, antiga merkadu Viqueque Vila. Identifikasaun ne’e sai hanesan bukae ida, hodi ba aprezenta ba Sektretáriu Estadu, depois loron ruma ami fali karik iha ona dadús hodi halo asaun ba ema hirak ne’ebé okupa espasu públiku”, katak Maria Odete Barros Florindo, ba jornalista sira, iha postu Viqueque, ohin.

Imajén Tatoli/Vitorino Lopes da Costa

Ba identifikasaun ne’e nia dehan, abitante iha kapitál Viqueque maioria okupa espasu públiku hanesan trotóar leten ne’e uza faan modo, maibé loos ne’e trotóar  ba ema la’o ain nian.

“Ami ba fali haree iha merkadu antiga ne’e ema presiza husik fatin, labele hela iha merkadu laran no balun husik animál iha laran. Ida-ne’e PAM sei haree hodi halo jestaun organiza labele sai hanesan agora ita haree. Tanba ita hotu iha lei nia okos, ne’ebé ita labele okupa espasu públiku hodi faan sasán no labele halo uma iha baleta leten”. Nia akresenta.

Iha fatin hanesan PAM Viqueque, Francisco C.S de Gonzaga Soares, haktuir sei forma ekipa integradu ida hodi halo identifika vendedór sira iha merkadu antiga, hodi muda ba merkadu Olobai ne’ebé sei halo reabilita.

“Agora ita-nia negosiante sira bele faan lai hodi hein notifikasaun hosi Terra Propriedade, tanba ita haree negosiante barak maka uza trotoar hodi faan sasán ne’ebé laiha ijiene ba ema-nia saúde, autoridade munisípiu sei haree”, nia afirma.

Tuir dadus provizoriu negosiante okupa iha merkadu antiga totál 140 ne’ebé daudaun ne’e sei faan, iha merkadu.

Tuir observasaun jornalista Agência Tatoli nota katak ekipa PAM hamutuk ekipa SETOU hahú halo identifika husi semitériu Beloi to’o iha área merkadu antiga, nune’e mós ekipa fó hanoin ba negosiente sira labele faan sasán iha trotoar leten no fó hanoin mós ba Xinéza sira labele faan  sasán tau iha liur.

Entretantu ekipa SETOU kompostu husi Diretór Jerál SETOU, ekipa tekniku no PAM Viqueque, Sekretáriu munisípiu Asuntu Dezenvolvimentu, Teniku Planu Dezenvolvimentu Integradu Munisipál (PDIM) no hetan akompaña husi xefe suku Caraubalu, João Pinto.

Bandu husik animál

Prezidente Autoridade Munisípiu (PAM) Viqueque, Francisco C.S de Gonzaga Soares,  preokupa tebe-tebes animál ne’ebé livre iha estrada públiku sira, nune’e tempu badak sei hasai karta sikulár ida hodi abitante sira sulan animál.

“Ohin loron ita-nia abitante barak lamenta animál ne’ebé la’o livre iha espasu públiku ne’ebé sai difikulta ba movimentu transporte sira. Tanba ne’e, ami sei tuir hamutuk ho parte relevante sira maka hasa’i  karta sigulár atu bandu ema labele husik animál livre”, nia sujere.

Bainhira karta sikulár ne’e sai mak autoridade sei servisu hamutuk ho Polísia Nasionál Timor Leste (PNTL) munisípiu Viqueque  atu komunidade labele husik livre animál.

Entretantu, Komadante Polísia Nasionál Timor Leste (PNTL), munisípiu Viqueque, Superintendente António Rego Fernandes, haktuir autoridade seguransa prontu fó apoiu ba autoridade nian planu sira ne’ebé autoridade sira hakarak kria hanesan bandu ema labele animál. .

Iha parte ketak,  Komunidade Viqueque, Juvita Soares, aseita atu autoridade bele kria regra rekirozu ida atu ema labele husik animál la’o livre.

“Tanba ne’e, ami komunidade ninia hakarak maka PAM hasa’i regra kona-ba animál ninia. Ohin loron ita haree animál la’o livre iha fatin públiku hanesan na’in laiha. Nune’e autoridade sira presiza kria lalais regra hodi bandu ema labele husik animál hodi fó risku ba komunidade ne’ebé utiliza transporte no labele estraga ambiente ”, katak nia.

Notísia relevante:Ekipa SEATOU halo despeju administrativu ba uma tolu iha Bucoli

Jornalista: Vitorino Lopes da Costa
Editór       : Florencio Mirinda Ximenes

iklan
iklan

Leave a Reply

iklan
error: Content is protected !!