PDHJ husu PN komunika Governu estabelese sentru reabilitasaun juvenil ba menoridade
DILI, 07 juñu 2024 (TATOLI)—Provedór Direitu Umanu no Justisa (PDHJ, siglá portugés), Virgílio Guterres, husu Parlamentu Nasionál (PN) atu komunika ho Governu hodi estabelese sentru juvenil ba minoridade sira-ne’ebé envolve krime.
Notísia Relevante: Membru PN husu Governu harii sentru reabilitasaun juvenil ba menoridade envolve krime
“Ami hato’o ba Prezidente Parlamentu Nasionál asuntu ne’ebé importante no urjente mak atu komunika ho Governu, ami reiteira ami-nia rekomendasaun estabelesimentu sentru reabilitasaun juvenil,” Provedór PDHJ ne’e hateten ba jornalista sira hafoin ramata enkontru ho Prezidente Parlamentu Nasionál (PPN), Maria Fernanda Lay, iha Parlamentu Nasionál, sesta ne’e.
Liuhusi sorumutu ne’e, PDHJ hato’o ba Prezidente Parlamentu Nasionál (PPN) atu hahú diskusaun halo komunikasaun ho Governu atu estabelese sentru ne’e.
Tanba, nia dehan, timoroan hotu akompaña situasaun envolvimentu menoridade iha krime maibé ba tribunál tanba relasiona ho lei imputabilidade labele julga, nune’e ikus mai komunidade balun sente katak sira injustisa tanba sira lakon família, maibé ikus mai lei la fó sansaun ba ema-ne’ebé envolve iha laran.
“Tanba, lei hateten joven sira menoridade labele julga ho lei ne’e, entaun iha nesesidade urjente atu sentru reabilitasaun juvenil,” nia hateten.
Sentru ne’e sai fatin reabilitasaun atu akumula joven menoridade sira-ne’ebé iha halo komfrontasaun ho lei ka prátika krime.
Antes ne’e mós, relatóriu PDHJ nian rekomenda ona ba Governu atu estabelese sentru reabilitasaun ne’e hodi muda komportamentu menoridade sira-nia hafoin reintegra fila-fali ba sosiedade no família.
Jornalista : Nelson de Sousa
Editór : Cancio Ximenes
