Membru PN husu Governu harii sentru reabilitasaun juvenil ba menoridade envolve krime
DILI, 31 maiu 2024 (TATOLI)—Membru Parlamentu Nasionál (PN) liuhusi Deputadu CNRT, Natalino dos Santos, husu Governu liuhusi Ministériu Justisa (MJ) ho Ministériu Solidariedade Sosiál no Inkluzaun (MSSI) atu kria sentru reabilitasaun juvenil ba menoridade sira-ne’ebé envolve iha krime.
Notísia Relevante: Jurista Quintas prefere halo alterasaun ba Kódigu Penál artigu 20 kona-ba imputabilidade
Nia hato’o preokupasaun ne’e tanba ikus-ikus ne’e envolvimentu menoridade prátika aktu krime, maibé to’o iha tribunál liberta tiha, ezemplu desizaun husi Tribunal judisiál primeira instánsia Dili ne’ebé liberta arguidu ida ba kazu hadau telefone ne’ebé rezulta vítima, Nituchia lakon vida, tanba razaun arguidu refere ho idade minoridade.
“Atu responde ba situasaun ne’e Estadu iha nesesidade atu harii sentru ne’e. Agora, oinsá haree planu ezekutivu nian, nune’e rekomenda ba MSSI ka MJ hodi iha posibilidade haree situasaun ne’e atu responde, tanba joven mak futuru nasaun nian,” nia hateten ba Agência Tatoli iha resintu Parlamentu, sesta ne’e.
Nu’udar Estadu ida tenke iha kondisaun bele akumula situasaun sira-ne’e, tanba futuru nasaun nian ne’e iha joven sira-nia liman maibé daudaun ne’e kazu barak akontese menoridade sira mak envolve iha krime.
Tanba ne’e, nia lamenta tebes tanbasá mak sai hanesan ne’e, nune’e tenke haree husi aspeitu sosiál no ekonomia mak ninia implikasaun ne’e ba to’o ne’eba.
“Maibé agora akontese tiha ona hanesan ne’e oinsá, tuir ita-nia lei, menoridade ne’ebé mak halo krime labele responsabiliza krime ne’ebé nia iha no ba iha tribunál absolve, tanba haree mós kona-ba konvensaun internasionál ba direitu umanu mós ko’alia ida-ne’e. Labarik kiik-oan ne’ebé halo krime ne’e, nia laiha responsabilidade atu responsabiliza aktu ne’e,” nia dehan
Deputadu membru komisaun B ne’ebé trata asuntu Negósiu Estranjeiru no Defeza ho Seguransa ne’e dehan, oinsá nia sei menoridade hela halo krime mak tuir lei nia labele responsabiliza ne’e mós preokupasaun ida, se lae sai hanesan toman ida entaun bolu atensaun ba Governu liuhusi MSSI ka MJ atu haree oinsá kria kondisaun sentru reabilitasaun juvenil, atu menoridade sira la hetan kastigu maibé tau iha sentru hodi fó akonselamentu ba sira atu konsolida fila-fali sira-nia mentál, hanoin, komportamentu hafoin halo fali ré-integrasaun ba família.
“Ida-ne’e la’ós kastigu maibé oinsá atu fó akonselamentu, nune’e sira bele la’o fali iha dalan loos,” nia hateten.
Antes ne’e, Deputadu CNRT, Francisco da Costa ‘Ikulai’ preokupa yanba ikus-ikus ne’e envolvimentu menoridade prátika krime barak tebes hanesan na’ok ema nia sasán, motor, hadau telefone no seluk tan, no kazu hadau telefone ne’ebé rezulta vítima, Nituchia lakon vida, nune’e husu ezekutivu presiza haree lei hodi haree mós responsabilidade ba aktu sira-ne’e.
Notísia Relevante: MP alega prizaun preventiva ba arguidu nain-hitu ne’ebé hadau telefone hodi hamate Nituchia Fangidae
Jornalista : Nelson de Sousa
Editór : Cancio Ximenes
