iklan

NASIONÁL, EKONOMIA, HEADLINE

Xefe Governu apela ba sidadaun hotu labele soe plástiku arbiru

Xefe Governu apela ba sidadaun hotu labele soe plástiku arbiru

Primeiru-Ministru, Kay Rala Xanana Gusmão, hamutuk ho membru IX Governu no funsionáriu sira, hamoos foer iha tasi Cristo Rei, sábadu (08/06/2024). Imajen/Mídia GPM

DILI, 08 juñu 2024 (TATOLI)Primeiru-Ministru (PM), Kay Rala Xanana Gusmão hamutuk ho membru Governu tomak inklui funsionáriu hotu husi ministériu sira, sábadu ne’e, halo limpeza jerál iha tasi-ibun área Cristo Rei to’o iha Areia Branca.

Inisiativa ne’e hodi selebra loron mundiál Oseanu, hahú husi loron 08 to’o 18 juñu, aleinde ne’e sei realiza mós eventu oin-oin ne’ebé foku ba dezenvolvimentu ekonomia azul.

Biban ne’e, IX Governu Konstitusionál halo mós kampaña nasionál ba selebrasaun loron mundiál ne’e ho tema: ‘Ha’u-nia Tasi, Ha’u-nia Timor.’

Xefe Governu konsidera, preokupasaun boot liu iha mundu tomak ohin loron maka tasi, ne’ebé nu’udar área ida labele foer tanba tasi mak fó buat di’ak ba natureza, tanba ne’e apela ba sidadaun hotu atu labele soe plástiku arbiru tanba bele estraga ambiente tasi no bele estraga mós biodiversidade iha tasi-laran.

“Ha’u husu de’it atu labele soe plástiku arbiru. Ha’u husu ne’e tanba di’ak ba imi, di’ak ba ita hotu, di’ak ba ita-nia tasi no di’ak ba ita-nia rain,” Xanana Gusmão hateten iha abertura selebrasaun loron mundiál Oseanu 2024, iha Cristo Rei.

Notísia relevante : 8 to’o 18 Juñu, Governu selebra loron mundiál Oseanu ho tema “Ha’u-nia Tasi, Ha’u-nia Timor”

PM haktuir, tinan kotuk liubá bainhira nia hamutuk ho delegasaun partisipa iha konferénsia internasionál ida iha Lisboa, Portugal kona-ba tasi nomós foin lalais partisipa tan konferénsia internasionál ida iha Antigua no Barbuda, ko’alia mós kona-ba tasi, tanba mundu preokupa ho tasi.

“Antigua no Barbuda hanesan rai kiik-oan ida ho populasaun 75.000, maibé furak tebes ho sira-nia rendimentu husi turizmu. Sira-nia tasi moos loos, la hanesan ho ita-nia iha ne’e, baibain ita liuhusi ne’e, haree tasi foer parmate. Ho kestaun ne’e maka ohin hotu-hotu mai iha ne’e hodi hamoos tasi no semana ida-ne’e nia laran sei kontinua hamoos tanba iha turista barak mak hakarak mai, maibé sira mai tiha iha ne’e no ha’u hasoru fali sira iha aeroportu ha’u husu sira, sira dehan ami bá haris tasi iha Areia Branca maibé sasán kro’at barak no tasi foer loos. Tanba ne’e mak ami filafali bá Bali tanba ninia tasi moos loos,” Xefe Governu haktuir.

Nia fó hanoin katak, turizmu ne’e la’ós mai hamoos de’it, maibé mós tenke kria kondisaun adekuadu atu ema mai karik sira sente fatin ne’e seguru no sira bele sente turizmu ne’e ninia furak no sabór.

Ba dahuluk selebra loron Oseanu

Xefe Governu dehan, foin ba dahuluk Timor-Leste selebra loron mundiál kona-ba tasi, nune’e ba oin sei selebra nafatin atu fó hanoin katak sidadaun hotu presiza sai responsável ba tasi ninia moos no la’ós de’it Governu ninia responsabilidade.

“Sidadaun hotu-hotu ninia responsabilidade maka bainhira kaer plástiku ruma iha liman karik, labele so’e arbiru maibé tau iha lixu fatin hodi sunu no la’ós soe arbiru atu udan mai lori hotu bá para iha tasi,” nia fó hanoin.

Tuir planu, iha loron ne’e sei iha lansamentu ‘Peixe Azul’ ka Ikan Azul, iha Palásiu Governu nian oin, husi Prezidente Repúblika, José Ramos-Horta, ne’ebé destaka perigu husi poluisaun botir plástiku ba tasi Timor-Leste no nesesidade atu rezolve problema ambientál sériu.

Eventu ne’e tuir kedan ho lansamentu livru labarik ho títulu ‘O Meu Mar, O Meu Timor’ ka Ha’u-nia Tasi, Ha’u-nia Timor, husi Primeiru-Ministru, Xanana Gusmão, iha Xanana Reading Room, iha Bidau Lecidere.

Pontu Fokál Ekonomia Azul husi liña ministériu sira sei halibur hamutuk durante loron-tolu husi loron 10 to’o 12 juñu iha formasaun espesializadu lideransa iha Ekonomia Azul iha Auditóriu Kay Rala Xanana Gusmão, iha Ministériu Finansa.

Sesaun formasaun ida-ne’e nia objetivu atu hametin liután protesaun ambientál, sosiál no ekonómiku ba Timor-Leste nia rekursu mariñu nian.

Durante sesaun separadu loron-ida hamutuk tolu mós sei hala’o husi loron 13 to’o 18 juñu, ba oradór xavi sira seluk inklui organizasaun sira sosiedade sivíl, setór privadu, ONG, mídia, Futuru Jovens Embaixadór bá Ekonomia Azul no mós ba Prezidente Autoridade Munisípiu sira.

Formasaun ne’e organiza husi Gabinete Fronteira Terrestre no Marrítima (GFTM), ne’ebé ninia formadór mak Álvaro Sardinha, hanesan mós treinadór no konsultór espesialista ida iha Ekonomia Azul husi Portugal.

Álvaro mós sei halo aprezentasaun espesiál ida kona-ba Ekonomia Azul nia poténsia no oportunidade sira iha Timor-Leste ba iha Konsellu Ministru iha loron 12 juñu.

Iha 14 juñu, sei hala’o mós Ekonomia Azul nia Feira Turizmu Mariñu, ne’ebé organiza husi Ministériu Turizmu no Ambientál, sei realiza iha Centre Court, Timor Plaza, no sei partisipa husi parseiru no emprezáriu lokál sira ne’ebé mak envolve iha setór turizmu mariñu.

Eventu loron ida-ne’e sei ajuda enkoraja interrese iha Timor-Leste nia oferta turizmu mariñu no poténsia sira.

Husi loron 15 to’o 16 juñu, Álvaro no ekipa husi Unidade Ekonomia Azul iha GFTM, sei halo viajen ba illa Ataúro atu hasoru malu ho autoridade lokál no líder sira, líder asosiasaun, pontu fokál husi indústria turizmu no setór sira seluk, inklui joventude sira atu sosializa konseitu Ekonomia Azul.

Álvaro mós sei vizita kooperativa komunitária sira iha Beloi no Vila Maumeta no bá luku-tasi hodi haree besik liután beleza tasi okos, ahu-ruin no biodiversidade mariña iha illa referidu.

Loron mundiál Oseanu selebra anualmente iha mundu iha loron 08 juñu hodi fó hanoin ba ema hotu kona-ba importánsia husi oseanu ne’ebé ema hotu fahe no depende ba ai-han, ai-moruk no ambiente.

Objetivu prinsipál husi loron mundiál Oseanu maka atu informa kona-ba impaktu negativu husi asaun umanu no atividade iha oseanu, hodi dezenvolve ka kria movimentu mundiál ida ba administrasaun oseanu no atu mobiliza no halibur hamutuk populasaun iha mundu tomak ba jestaun oseanu ne’ebé mak sustentável.

Iha Timor-Leste, IX Governu Konstitusionál liuhusi Primeiru-Ministru, Kay Rala Xanana Gusmão, fó ona prioridade ida atu foku ba dezenvolvimentu Timor-Leste nia Ekonomia Azul, ne’ebé nia objetivu maka atu haree ba nasaun nia rekursu sira seluk iha tasi Timor, aleinde nasaun nia rekursu mina no gás hodi dudu dezenvolvimentu no mellora timoroan sira hotu nia moris.

Jornalista     : Hortencio Sanchez

Editora           : Julia Chatarina

iklan
iklan

Leave a Reply

iklan
error: Content is protected !!