INSS koloka funsionáriu foun 86 bá munisípiu sira hodi reforsa serbisu
DILI, 09 juñu 2024 (TATOLI) – Institutu Nasionál Seguransa Sosiál (INSS) koloka, iha semana ne’e, funsionáriu foun hamutuk 86 bá munisípiu sira atu reforsa serbisu instituisaun iha terrenu, informa prezidente tutela, Arlindo Pinto.
Dirijente ne’e esplika katak funsionáriu sira ne’e rekruta liuhusi vaga ne’ebé INSS loke iha Fevereiru no konklui nia prosesu iha Maiu ne’e.
“Ema ne’ebé kompete ba vaga ne’e hamutuk 2.300, liu selesaun dokumentu 1.110. Teste eskrita liuhusi online hamutuk 210 mak liu no ba entrevista 86 mak pasa. Ita fó formasaun ona durante loron kinta no sesta. Iha sábadu no domingu hahú dezloka ona bá munisípiu idaidak, nune’e segunda [10/06] hahú ona serbisu”, Arlindo Pinto informa iha Caicoli, Dili.
Nia hatutan formasaun ne’ebé pesoál 86 aprende durante loron rua mak kona-ba sistema seguransa sosiál no administrasaun públika husi INSS, inklui dekretu-lei sira ba responsabilidade funsaun públika nian.
Objetivu INSS loke vaga ba pesoál sira ne’e, tuir Arlindo Pinto, tanba falta funsionáriu iha munisípiu, nune’e sira bele reforsa iha terrenu atu buka hatene dadus sira idozu nian, tanba balun ne’ebé simu pensaun sosiál mate ona, maibé dalaruma laiha informasaun.
“Ita rekoñese iha munisípiu idozu sira balun mate ona, maibé lideransa komunitáriu la informa ba pesoál INSS ne’ebé serbisu iha munisípiu, entaun pagamentu kontinua la’o. Ida ne’e hatudu falta koordenasaun, tanba tuir loloos líder komunitáriu sira mak tenke informa ba ita, tanba nia mak hatene nia ema hira mak moris no mate. Governu só fasilita pagamentu”, nia dehan.
Tanba kestaun ne’e maka INSS halo ona rekrutamentu ba pesoál foun sira hodi destaka bá postu administrativu sira hodi hala’o knaar sira ne’e.
“Ha’u husu tulun ba líder komunitáriu sira iha munisípiu, postu administrativu, no suku sira kolabora ho funsionáriu INSS sira iha munisípiu atu fó informasaun iha kualkér tempu relasiona ho pensaun sosiál nian, nune’e ida ne’ebé mate ona laiha ema ida mak reprezenta hodi simu fali”, nia hateten.
Atu evita situasaun sira ne’e mak daudaun INSS halo ona planu kalenderizasaun ida atu la’o hamutuk ho Ministériu Administrasaun Estatál (MAE) hodi halo diálogu komunitáriu ho xefe suku sira hodi fó informasaun detalla, nune’e bele iha kolaborasaun ne’ebé di’ak ba iha pagamentu sira.
“Ita-nia planu sei hala’o tinan ne’e hafoin pagamentu idozu no invalidéz faze dahuluk no kontinua kedan hala’o ida ne’e iha territóriu”, Prezidente INSS adianta.
Notisia relevante: INSS loke vaga ba pesoál hamutuk 42 hodi reforsa serbisu instituisaun
Jornalista: Arminda Fonseca
Editora: Maria Auxiliadora
