COVALIMA, 09 Juñu 2024 (TATOLI) – Ministra Solidariedade Sosiál no Inkluzaun, Verónica das Dores, no Ministra Edukasaun, Dulce de Jesus, observa vítima dezastre naturál iha Suai Loro.
Iha vizita ne’e, Ministra Verónica husu ba populasaun sira iha suku Suai Loro, postu Suai, labele sunu rai no tesi ai, nune’e iha tempu udan labele hamosu dezastre naturál.
“Ami reprezenta Primeiru-Ministru Kay Rala Xanana Gusmão hato’o haku’ak boot ba ita-boot sira, tanba Primeiru-Ministru labele mai, nia viajen bá rai-li’ur”, Verónica das Dores hato’o iha sentru evakuasaun Covalima, ohin.
Governante ne’e fó hanoin ba vítima katástrofe katak iha loron 08 Juñu ne’e, Ezekutivu lansa ona kampaña nasionál “Ha’u-nia Tasi, Ha’u-nia Timór”, nune’e ba futuru presiza atu proteje tasi ho di’ak.
“Labele sunu rai, tesi ai no so’e lixu arbiru. Bainhira atu so’e lixu presiza tau iha nia fatin, tanba mundu tomak ameasadu ba inundasaun maske rai tetuk, udan durante oras haat bele hamosu inundasaun”, dehan.
Iha sorin seluk, Ministru Edukasaun, Dulce de Jesus, salienta iha situasaun emerjénsia ministériu idaidak hala’o nia knaar, Ministériu Saúde haree kona-ba asuntu saúde, balun haree apoia ai-han no Edukasaun haree sobre edukasaun.
“Inundasaun la’ós akontese de’it iha Covalima, akontese mós iha fatin sira seluk, entaun presiza mós rona ita-boot sira-nia hanoin saida mak presiza atu ajuda malu. Ami hakarak mai hamutuk ho ita-boot sira hodi sente katak ida-ne’e ami-nia responsabilidade”, realsa.
Ho prezensa Ministra Edukasaun nian atu buka hatene estudante sira ne’ebé afeta ba iha inundasaun no ministériu lori livru istória ba inan-aman no estudante sira, nune’e bele lee.
Lembra katak udan-boot ne’ebé tau iha loron 07 no 08 Juñu hamosu inundasaun no afeta ema hamutuk 610, husi númeru ne’e 100-resin mak estudante, iha suku Suai Loro, aldeia Loro, Loo no Mane-Ikun. Vítima sira ne’e daudaun hela iha sentru evakuasaun.
Antes ne’e, udan ne’ebé tau, entre loron 30 Maiu no 01 Juñu, afeta mós família hamutuk 256 ne’ebé mai husi postu Tilomar, Maucatar, Suai no Zumalai, inklui danifika infraestrutura bázika hanesan estrada no ponte sira.
Notísia relevante: Inundasaun iha Suai Loro obriga retira ema 546 husi nia hela fatin
Jornalista: Celestina Teles
Editora: Maria Auxiliadora
