COVALIMA, 09 juñu 2024 (TATOLI)-Governu liuhusi Ministériu solidariedade sosiál no inkluzaun (MSSI) no Ministériu edukasaun (ME) apoia nesesidade bázika no matéria eskolar ba komunidade no estudante afetadu husi inundasaun hamutuk na’in-654 ne’ebé konsentra hela iha sentru evakuasaun iha eskola sekundariu jerál públiku suku Suai Loro, Postu administrativu Suai, Munisípiu Covalima, domingu ne’e.
Ministra solidariedade sosiál no inkluzaun, Veronica das Dores, afirma, apoiu sira mak hanesan hahán no suplementu naton ba komunidade afetadu sira hodi tulun sira iha tempu-badak hodi hein situasaun normál.
Governante ne’e husu mós ba komunidade sira atu koopera ho entidade relevante hodi loke bee-dalan nune’e ba futuru labele mosu tan inundasaun.
“Iha lorokraik ida-ne’e ami mai fó ai-han naton no suplementu inklui mós foos. Alende ne’e, oferese mós nesesidade labarik estudante sira nian, ne’ebé oferese husi parseiru sira. Ho hahán naton ne’ebé oferese la’ós garante ba tempu-naruk maibé bele fasilita loron ida ka rua hodi hein ba situasaun normál fali,” ministra solidariedade sosiál hateten iha ámbitu entrega nesesidade bázika ba vítima afetadu sira iha eskola sekundaria jerál Públiku Suai, Postu administrativu Suai Vila, Munisípiu Covalima, ohin.
Membru governu ne’e apela mós ba vítima inundasaun sira atu hadomi ambiente liu-liu labele tesi ai no no sunu rai nune’e bainhira udan labele mosu inundasaun nune’e komunidade labele vítima tan.
Iha fatin hanesan, Ministra edukasaun, Dulce de Jesus garante katak Ministériu edukasaun nafatin observa no akompaña liu-liu estudante sira ne’ebé afetadu husi inundasaun ne’ebé akontese iha Covalima.
Tuir dadus ne’ebé Ministériu edukasaun hetan, estudante vítima inundasaun hamutuk 173 tanba ne’e ministériu sei oferese atributu sira estudante nian nune’e fasilita sira-nia atividade rekoperasaun hodi hein normalizasaun ba atividade aprendizajen nian.
“Tuir lista katak iha estudante 173 mak afetadu, nune’e materiál naton ne’ebé ami lori sufsiente ba ita-boot sira atu utiliza. Materiál sira ne’e mak hanesan lápis kores, iha bola, iha rede, kadernu, revista Lafaek no seluktan. Dala ida tan husu profesór sira atu eskola ne’ebé mak hamoos no normaliza ona bele hala’o no reativa fali prosesu aprendizajen, no eskola Serankotek mak seidauk nune’e sei hamoos hodi normaliza fali atividade lorloron nian,” Dulce de Jesus hateten iha Eskola sekundária jerál públiku Suai.
Dulce de Jesus énfaze, Ministériu edukasaun aproxima ho biblioteka movel oinsá bele rekopera estudante vítima sira-nia kondisaun trauma liuhusi atividade desportiva, múzika, ne’ebé Ministériu edukasaun prepara.
Iha oportunidade hanesan, Prezidente autoridade munisípiu Covalima, Miguel Armada Cardoso agradese ba entidade hotu liu-liu ba governu sentrál ne’ebé tau atensaun ba vítima inundasaun ne’ebé akontese iha munisípiu Covalima nune’e mós entidade relevante seluk ne’ebe servisu ho koordenasaun di’ak tebes.
“Ita agradese tanba durante inundasaun ita la mesak, membru governu lubun ida mai iha ne’e ohin mai tan Ministra solidariedade sosiál inkluzaun no mós Ministra edukasaun mai iha ne’e hodi fó apoiu ba komunidade no estudante ne’ebé afetadu husi inundasaun iha semana kotuk. Ida-ne’e ita gradese no mós ba saúde sira no sira seluk tan ne’ebé ita servisu integradu no koordenasaun di’ak tebes,” autoridade másima Munisípiu Covalima ne’e hateten.
Entretantu, hafoin distribuisaun nesesidade bázika ba komunidade sira, ekipa konjunta re-aloka hikas komunidade afetadu ba sira-nia hela fatin ida-idak iha suku Suai loro nian.
Tuir ajenda ekipa sei kontinua observa kondisaun komunidade nian nune’e mós estabelesimentu ensinu sira hodi hala’o hikas prosesu aprendizajen la’o ho normál.
Jornalista :Anito Soares
Editór : Rafael Ximenes de A. Belo
