HEADLINE, INKLUZAUN SOSIÁL

Uma-kain rihun 5 iha RAEOA no Ataúro hetan ona apoia umanitária

Uma-kain rihun 5 iha RAEOA no Ataúro hetan ona apoia umanitária

Ministra Solidariedade Sosiál no Inkluzaun (MSSI), Verónica das Dores. Imajen Tatoli/Francisco Sony

DILI, 09 juñu 2024 (TATOLI) – Ministériu Solidaridade Sosiál no Inkluzasaun (MSSI) disponibiliza ona apoia umanitária ba família hamutuk rihun 5 iha Rejiaun Administrativa Espesiál Oé-Cusse Ambeno (RAEOA) no Ataúro.

Ministra Solidaridade Sosiál no Inkluzaun, Verónica das Dores, hateten ajuda ne’ebé MSSI halo bazeia ba pedidu ne’ebé tama, tanba kada tinan ministériu aloka orsamentu sosa foos no kompleta ho ai-han sumplementár sira seluk.

“Ita hahú halo apoia umanitária ba ema vulnerável no kondisaun defisiénsia husi fulan-Abríl, Maiu 2024 ba benefisiáriu uma-kain hamutuk rihun 5, husi númeru ne’e rihun 2 husi RAEOA no rihun 3 husi Ataúro”, Verónica das Dores informa ba Tatoli.

Apoia ne’ebé MSSI fó mak hanesan foos kompleta ho hahán suplementár sira hanesan susun-been, manu-tolun, mie sedaap no seluk tan.

“Apoia ai-han ba komunidade ne’e la’ós atu rezolve buat hotu, maibé atu tulun uma-kain sira hodi sustenta moris ba tempu balun, tanba tuir polítika IX Governu nian tenke hakbesik aan liután ba povu, entaun pedidu sira tama, ita tuun diretamente fó apoiu ba maluk sira ne’ebé presiza”, ministra hatutan.

Governante ne’e salienta katak ba futuru nafatin disponibiliza ai-han ba família vulneravel sira tuir pedidu sira ne’ebé tama iha ministériu.

Apoia umanitária ne’ebé MSSI halo ne’e nia orsamentu prevee kada tinan iha Diresaun Nasionál Asisténsia Téknika hodi sosa foos no ai-han komplementár sira hodi fornese ba komunidade vulnerável sira. Hahán sira ne’e tau iha armazein Sentru Solidaridade Sosiál iha munisípiu sira hodi fó tulun ba família sira bainhira presiza.

“Orsamentu ne’ebé ita prevee ba sosa foos ne’e hamutuk rihun $495 ho tan apoia komplementár balun hamutuk rihun $100. Husi verba ne’e, sosa foos saku rihun 28 ka tonelada 7,7”, Verónica adianta.

Notísia relevante: https://tatoli.tl/2024/05/13/mssi-rejista-uma-kain-2-000-vulneravel-iha-raeoa-sei-hetan-ajuda-umanitaria/

Jornalista: Arminda Fonseca

Editora: Maria Auxiliadora

iklan
iklan

Leave a Reply

iklan
error: Content is protected !!