iklan

POLÍTIKA

Deputada PD preokupa médiku espesialista fó tempu konsulta iha klínika privadu

Deputada PD preokupa médiku espesialista fó tempu konsulta iha klínika privadu

Deputada hosi bankada Partidu Demokrátiku (PD), Maria Teresa Gusmão. Imajen Tatoli/Nelson de Sousa.

DILI, 10 juñu 2024 (TATOLI)—Deputada PD iha Parlamentu Nasionál (PN), Maria Teresa Gusmão, hato’o preokupasaun pontu ualu (8) iha área saúde nian liuliu médiku espesialista fó liu tempu konsulta iha klínika privadu.

Notísia Relevante: https://tatoli.tl/2024/05/22/ohin-pn-adia-debate-ho-ministra-saude/

“Ohin, ha’u hakarak foti kestaun saúde ne’ebé ha’u bele asesu. Primeiru iha tendénsia pasiente moras komplikasaun no idózu sira, pesoál saúde sira ladún fó asisténsia másimu nune’e bele to’o iha situasaun grave. Daruak, médiku Kubanu sira dalabarak lorokraik la tama serbisu tanba fó liu tempu hanorin estudante medisina sira-ne’e mós afeta serbisu saúde nian. Datoluk, médiku espesialista sira-ne’ebé Governu selu ho bolsu estudu fó liu tempu no konsulta iha klínika privadu, nune’e pasiente grave ladún hetan atendimentu lalais iha kualkér tempu ne’ebé perígu no grave,” Deputada PD ne’e hato’o liuhusi intervensaun iha reuniaun plenária Parlamentu Nasionál, segunda ne’e.

Dahaat, nia dehan, iha moras grave ou asidente todan telefone médiku espesialista sira la mai, sira fó de’it instrusaun liuhusi telefone ba enfermeiru ka médiku jerál, nune’e kauza hamosu komplikasaun ba pasiente afeta mós mortalidade.

Deputada membru komisaun F ne’ebé trata asuntu Saúde iha PN ne’e, hato’o pontu dalimak mak liga enfermeiru espesialista no médiku hahú husi tuku rua ba leten la tama serbisu, tanba foti oras extra ba hanorin universidade ou institutu sira fakuldade saúde nian, nune’e afeta ba kualidade atendimentu ba pasiente sira.

Daneen, manorin saúde ka enfermeriu no médiku sira uza pasiente moras espesífiku nu’udar percobaan ba estudante sira halo estudu kazu no observasaun, ne’e laiha étika ba segredu pasiente.

“Tanba, ha’u rasik mós haree ho matan médiku halo ezaminasaun ba feto no inan-isin rua, estudante lubun feto no mane ho observasaun ba inan-isin rua ne’e, ne’e laiha étika tanba ita-nia isin la’ós show. Tanba, tuir étika profisaun médiku, estudante sira-ne’ebé seidauk simu juramentu profisaun liuliu estudante médiku jerál seidauk bele halo observasaun ba pasiente moras espesífiku, pasiente iha direitu ba segredu no privasidade. Ida-ne’e mós pasiente barak liu ba klínika privadu ne’ebé ho atendimentu di’ak-liu maske karun, duké ba ospitál ne’ebé ho gratuitu,” nia dehan.

Dahitu, ba pasiente konsulta rutina ho hemu ai-moruk rutina nia moris moris tomak ho ai-moruk espesífiku dalaruma stock ai-moruk limitadu no mós folin karún, nune’e médiku sira pasa de’it reseita ai-moruk loron rua ka tolu labele fó fulan to’o semana, nune’e fó mós kauza ba asuntu preokupasaun hanesan mortalidade ne’e.

Daualu, sujere atu sala emerjénsia iha parte ICU no parte iha sala hotu-hotu moras nian labele husik mesak estajiadu sira liuliu moras grave no primeiru sukoru, tenke akompaña ho pesoál saúde senior ho esperiénsia naruk, tanba matenek iha kakutak la kestionável, maibé esperíénsia  ne’e osan mean ida, presiza hadi’a sistema atendimentu internál.

Nune’e, Deputada husi bankada Governu ne’e rekomenda moras no mate ita-nia destinu ema hotu nian tanba ema ida la sees maibé hela ho memória bainhira mate ho dignu.

Tuir mai, nia hateten, enfermeiru no médiku serbisu estra ne’e la’ós sira-nia sala tanba ema hotu iha direitu moris no hakslok ho kualidade iha mundu, liuliu iha Timor-Leste profisaun médiku ne’e estatutu sosiál ne’ebé aas liu iha sosiedade, inan-aman hasai osan rihun ba rihun selu profisaun atu sai médiku.

Tanba ne’e, tuir nia. sira merese hetan previléjiu bo Governu iha dever kria kondisaun previléjiu ho saláriu aas atu garante atendimentu serbisu ho kualidade, ema ezije dever maibé garante mós direitu.

Asuntu hirak ne’e ema atu reflete katak, ho problema korrente husi Governu ida ba Governu seluk ne’ebé la’ós foin mak akontese só laiha de’it keda no vontade másimu atu jere problema no follow up.

Nia hateten, ne’e la’ós Governu ida nia problema maibé ida-ne’e Timor nia oan husi tempu ida ba tempu seluk no husi Governu ida ba Governu seluk, timoroan hamutuk hadi’a no lalika fó sala ba malu.

Nia sujere ba Governu Konstitusionál sa-sia atu ho beran boot halo reforma administrasaun ne’ebé saudável ba ministériu hotu-hotu.

Iha reuniaun plenária ne’e, deputadu sira balun husi bankada opozisaun foti mós preokupasaun kona-ba problema ai-moruk stock out iha fasilidade saúde balun no asuntu saúde sira seluk hodi husu ezekutivu atu tau atensaun.

Iha reuniaun plenária, Vise Ministru ba asuntu Parlamentár, Adérito Hugo da Costa, rejista de’it preokupasaun Deputadu sira-nian ba asuntu saúde nian no la konsege responde tanba tempu, nune’e rejista preokupasaun hotu sei enkamiña ba entidade relevante.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!