iklan

SAÚDE

INFPM planeia sosa ai-moruk bazeia ba dadus morbilidade

INFPM planeia sosa ai-moruk bazeia ba dadus morbilidade

Diretór Ezekutivu Institutu Nasionál Farmásia Produtu Medikamentu (INFPM), Brigído Simão Dias de Deus. Imajen/TATOLI.

DILI, 10 juñu 2024 (TATOLI)–Diretór Ezekutivu Insitutu Nasionál Farmasia no Produtu Medikamentu (INFPM), Brígido Simão Dias de Deus, hateten Governu liu hosi INFPM sei halo estudu ida hodi sosa ai-moruk bazeia ba morbilidade ka tuir moras ne’ebé rejista aas (makaas) iha Timor-Leste.

Nia esplika, iha fómula ida atu halo planu ba sosa ai-moruk ne’ebé atuál bazeia ba totál populasaun Timor-Leste iha millaun 1,3, ne’ebé bazeia ba estandar Organizasaun Mundial Saúde nian, ema ida presiza $3 hodi sosa ai-moruk, ho ida-ne’e multiplika ba tinan ida Timor-Leste presiza millaun $16 atu sosa ai-moruk de’it.

“Formula ida mak bele uza dadus morbilidade ka dadus kazu ba moras. Ezemplu, Timor ne’e iha moras diareia no me’ar hira, bazeia ba dadus ne’e mak ita atu kompra ba medikamentu,” Diretór Ezekutivu INFPM ne’e hateten liuhosi konferénsia imprensa, iha Kampumg Alor.

Durante ne’e, uza dadus totál populasaun ne’e mak tinan 2023 ne’e, INFPM uza millaun $9 ba kompra ai-moruk, entaun fahe ba kada populasaun kada ema ida hetan $9 hodi sosa ai-moruk.

“Ami agora akumula hela dadus para ba oin ne’e ita uza dadus morbilidade ne’e mak di’ak liu, tanba ita uza ai-moruk ne’e bazeia ba nesesidade. Hanesan ema tuberkuloze hira, ita sosa ai-moruk ho nia kalkuasaun, iha formula ida atu kalkula iha tinan ida ita presiza medikamentu hira. Buat hotu-hotu la’o hela,” nia dehan.

Tuir nia, iha relatóriu kada fulan iha Ministériu Saúde iha dadus kompletu, ezemplu servisu saúde Munisipiu Baucau rejista ema hira ba tee-been no tuberkuloze.

Bazeia ba dadus ida-ne’e sei sai ba planu ida no kalkulasaun ba kompra ai-moruk, no neste momentu uza dadus totál populasaun maibé menus efetivu, tanba ne’e mak buka meiu oin seluk atu nune’e bele responde ba situasaun.

Nia esplika, liutan sei iha sentru saúde ruma ema me’ar tinan ida rihun ida, sentru uza ai-moruk saida de’it, ezemplu Amoxicilin ka OBH, ida ne’e mak sei sai multiplika ba orsamentu no ba planu sosa medikamentu.

Jornalista : Jesuína Xavier

Editór        : Cancio Ximenes

iklan
iklan

Leave a Reply

iklan
error: Content is protected !!