iklan

DESPORTU, HEADLINE

Liki Taibessi FC 2-3, Maubale FC ultrapasa kedan ba 16 finál

Liki Taibessi FC 2-3, Maubale FC ultrapasa kedan ba 16 finál

Jogu Futebol Kopa Maun Boot Kayrala Xanana Gusmão 2024, FC Taibessi kontra FC Maubale, iha estadiun Munisípal Dili, segunda (10/06). Imajen Tatoli/Francisco Sony

DILI, 10 juñu 2024 (TATOLI) – Ekipa Maubale FC susesu ultrapasa ona ba 16 finál iha kopa Maun Boot Kay Rala Xanana Gusmão bainhira liki nia adversáriu Taibessi FC ho rezultadu 3-2 iha jornada ikus faze grupu nian.

Jogu ba ekipa rua lidera husi árbitru prinsipál Fernando Costa, juiz liña Filomeno da Silva, Donatos Portela no árbitru rezerva Pedro Braga no jogu realiza iha Estádiu Munisipál Dili, segunda loraik ne’e.

Bainhira jogu la’o ekipa rua lansa kedan kontra no atake ba malu tuir tékniku no ablidade ekipa idaidak nian. Maubale ho Taibesse ne’ebé iha ambisaun boot hakarak manán jogu ne’e, nune’e bele ultrapasa ba 16 finál.

Jogu Futebol Kopa Maun Boot Kayrala Xanana Gusmão 2024, FC Taibessi kontra FC Maubale, iha estadiun Munisípal Dili, segunda (10/06). Imajen Tatoli/Francisco Sony

Maubale lansa kontra no atake ne’ebé maka’as hasoru Taibesse halo Taibesse la kontrola ho di’ak nune’e iha minutu 10 jogadór Expedito Ximenes (24) lansa ona golu primeiru hodi muda rezultadu ba 1-0.

Golu ne’e halo Taibesse tenke servisu másimu liutan, tenke hasai kosar ne’ebé maka’as oinsa domina hikas jogu nune’e bele prodús golu. Maibé esforsu Taibessi nian seidauk kona iha alvu.

Mabale ne’ebé mai ho forsa estraordinariu konsege halo barullu bola iha kampo laran ikus Taibessi falta kontrolu, nune’e iha minutu 32 jogadór Carlos Fernandes (21) lansa tan golu ida muda rezultadu ba 2-0.

Maske sofre ona golu rua, Taibesse nunka lakon esperansa, kontinua luta ho tatika ne’ebé treinadór haraik ona ba jogadór sira, kontra atake manas liutan iha minutu ba minitu, nune’e iha minutu 37 bola barullu iha lina oin Maubale halo defeza la antisipa ho di’ak jogadór Taibesse Anggiso Barbosa (20) responde ona golu ida hodi muda rezultadu ba 1-2.

Golu ne’ebé Anggiso prodús hanesan golu ikus ba ekipa rua iha minutu primeira parte, to’o minutu normal termina laiha tan golu ruma nune’e Maubale provijoriu lidera jogu ho eskore 2-1.

Haka’at ba segunda parte ekipa rua nafatin lansa kontra no atake ne’ebé maka’as. Taibesse buka meiu oioin halo mudansa ba jogu nune’e bele halo empata jogu ne’e. Esforsu iha minutu segunda parte ne’ebé Taibesse halo la hela de’it hanesan esforsu tanba iha miutu 48 jogadór Jardel Piedade (10) responde duni golu ida hodi halo empata jogu ne’e ba 2-2.

Golu ne’e empede ona Maubale atu ultrapasa ba 16 finál, nune’e treinadór Maubale buka meiu oioin, oinsa atu aumenta golu, maibé jogu la’o to’o minutu 68 jogadór Exopedito aumenta duni golu ida hodi muda rezultadu ba 3-2.

Golu ne’e hanesan golu ikus ba ekipa rua no golu vitoria ba Maubale tanba jogu la’o to’o minutu termina laiha tan ekipa ida mak prodús golu vitoria hela ba Maubale hodi rekolla pontu tolu.

Rezultadu ne’ebé Maubale hetan lori ekipa ne’e rekolla pontu neen okupa pozisaun segundu iha grupu H. Enkuantu pozisaun primeiru okupa husi Laisorulai ne’ebé ho pontu hitu. Tanba ne’e ekipa rua seluk hanesan Taibesse no Daudare FC labele ona avansa ba 16 finál tanba pontu la to’o.

Notísia relevante: Iraler FC prontu enfrenta jogu kontra Maubale FC

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!