DILI, 23 maiu 2024 (TATOLI) – Asistente treinadór klube Iraler FC, Virgilio Freitas, hatete, prontu enfrenta jogu kontra adversáriu Maubale FC, iha kopa Federasaun Futeból Timor-Leste (FFTL) ne’ebé sei realiza aban (24/05), iha Estádiu Munisipál Dili.
“Ami nia ekipa preparadu, maske ita haree Maubale nia jogadór barak mak joga ona iha liga primeira divizaun no segunda divizaun, maibé ida ne’e la sai dezafiu ba ami, jogu minutu 90 iha kampu laran mak sei termina,” Virgílio katak ba jornalista sira iha Estádiu Munisipál Dili, kinta ne’e.
Notísia relevante:10 Maiu, Klube futeból 16 partisipa abertura kopa FFTL
Nia dehan, estratejia hotu halo ona maibé dalaruma sei iha mudansa bainhira haree Maubale halo presaun maka’as.
“Estratejia ita iha, maibé ami sei haree mós Maubale nia jogu, se sira halo presaun maka’as mak ami sei lansa mós ami nia kontra no atake hodi hamate sira nia jogu,” nia katak.
Iha fatin hanesan, Treinadór Maubale FC, Moises da Silva, mós responde katak prontu joga hasoru klune referidu tanba iha tempu barak halo ona preparasaun no tarjetu sei manán iha jogu primeiru ne’e.
“Ami iha tempu lubuk ida hodi halo preparasaun, maibé jogu ne’e iha buat tolu mak ita tenke simu, manán, empata no lakon, maibé tolu ne’e ami hili liu mak manán, ami sei esforsu maka’as tanba Iraler mós ekipa ne’ebé preparadu,” treinadór ne’e katak.
Tuir nia, jogu ne’ebé aban hala’o hanesan faze grupu bainhira la konsege gaña pontu tolu sei esforsu iha jogu rua ikus nune’e bele ultrapasa ba meiu finál.
Jogu ba ekipa rua hanesan jogu primeiru iha faze apuramentu grupu C nian. Maibé iha jogu antes ne’e ekipa FIEL FC kontra Zhavia FC empata no ekipa rua tenke fahe pontu ba malu 1-1, enkuantu Maubale ho Iraler seidauk iha pontu tanba aban foin hala’o jogu.
Notísia relevante: Laisorulai FC susesu hadau pontu tolu husi Maubale FC
Jornalista: Hortencio Sanches
Editór: Florencio Miranda Ximenes
