iklan

DESPORTU, HEADLINE

10 Maiu, Klube futeból 16 partisipa abertura kopa FFTL

10 Maiu, Klube futeból 16 partisipa abertura kopa FFTL

Logotipu FFTL. Imajen/Espesiál

DILI, 03 maiu 2024 (TATOLI)– Diretór Kompetisaun no Futeból Profesionál Federasaun Futeból Timor-Leste (FFTL), Frederico Martins, informa, loloos jogu ne’e abertura iha 02 Maiu, maibé tarde iha rejistrasaun, nune’e adia ba  loron 10 Maiu no klube hotu konfirmadu kompete iha kopa FFTL 2024.

“Aban ita halo ona enkontru tékniku entre FFTL ho klube sira hodi dada kedan sorteiu, nune’e loron 10 Maiu jogu hala’o ona durante fulan-rua,” Diretór Frederico informa ba Agência TATOLI iha edifisiu Ministériu Juventude Desportu Arte no Kultura (MJDAK), Lecidere-Dili, sesta ne’e.

Diretór Kompetisaun no Futeból Profisional iha Federasaun Futeból Timor-Leste (FFTL). Imajen Tatoli/Francisco Sony

Kompetisaun referidu sei realiza semana ida dala-tolu hahú sesta to’o domingu no termina iha 27 juñu. Jogu ne’e klube hamutuk 16  mak partisipa no sei fahe ba grupu ha’at.

Klube 16 ne’ebé konfirmadu atu kompete iha kopa FFTL mak hanesan, São José FC, DIT FC, FIEL FC, FC Iralere, Mature FC, AS Kantada, FC Ostico, Relay FC, Zhavia-Kuda Ulun FC, B2B, Assa FC, Atletico de Mota Ain, Rai Klaran FC, Maubale FC, Mushila FC no Lica-Lica Lemorai FC.

Iha sorin seluk na’in ba klube São José hanesan mós treinadór Antonio Timotio, afirma preparadu kompete iha kopa FFTL.

“Ami São José preparadu no prontu ona atu kompete iha kompetisaun ne’e, loloos FFTL loke oportunidade ba klube sira iha Liga Futeból Amadora mak kompete, maibé klube sira iha liga la ba rejistu, entaun ami mós foti desizaun ba rejistu,” katak nia.

Daudaun ne’e,  jogadór kompletu ona no halo ona preparasaun besik ona fulan-ida no garante atu hatudu rezultadu di’ak iha kompetisaun ne’e.

Iha jogu ne’e, FFTL prepara ona prémiu ba manán na’in-sira hanesan primeiru lugar sei hetan osan $15.000, segundu lugar $10.000, terseiru lugar $7.500 no kuartu lugar $5.000.

Kopa FFTL realiza iha Estádiu Munisipál Dili tanba FFTL koordena ona ho Governu liuhusi MJDAK.

Jornalista: Hortencio Sanchez

Editór       : Florencio Miranda Ximenes

iklan
iklan

Leave a Reply

iklan
error: Content is protected !!