DILI, 10 juñu 2024 (TATOLI)—Membru Parlamentu Nasionál (PN, liuhusi Deputadu bankada CNRT, Gabriel Soares, husu Komisaun Funsaun Públika (KFP) atu aselera prosesu lei reforma obrigatóriu ba funsionáriu públiku.
Notísia Relevante: KFP prepara aprezenta alternativa balun ba idade reforma funsionáriu públiku
“Husu ba Governu atu aselera lei reforma obrigatória ba funsionáriu sira-ne’ebé mak idade ita haree katak, sira hein hela bainhira mak lei ne’e aprova para sira mós hakarak deskansa ona iha sira-nia vida restu ne’ebé mak iha,” nia hato’o liuhusi reuniaun plenária Parlamentu Nasionál, segunda ne’e.
Nia dehan, inan no aman sira-ne’ebé sai hanesan funsionáriu públiku ho idade 60 ba leten ne’e barak no balun mate ona sein reforma ida.
Iha ema barak mós moras iha uma de’it liuliu funsionáriu sira-ne’ebé haknaar aan iha instituisaun ne’ebé mak importante tebes, hanesan iha edukasaun barak tebes husi inan-aman sira hanesan manorin ne’ebé antigu ne’e, balun hakas aan ba nafatin hanorin maibé balun iha uma de’it ona.
Tanba ne’e, Vise Prezidente komisaun G ne’ebé trata asuntu Edukasaun iha PN ne’e dehan, balun diretór eskola sira atu halo jestaun fahe karga oráriu ne’e susar tebes, tanba sira kondisaun moras entaun nia prezudika saladeaula balun tenke mamuk, tanba sira efetivu hela.
“Husu ba Governu no Komisaun Funsaun Públika (KFP) para aselera mai Governu atu urjente atu haree ona lei reforma ne’e,” nia dehan.
Liuhusi reuniaun plenária, Vise Ministru ba asuntu Parlamentár, Adérito Hugo da Costa, rejista intervensaun husi deputadu CNRT ne’e hodi hato’o ba instituisaunrelevante.
Jornalista : Nelson de Sousa
Editór : Cancio Ximenes
