COVALIMA, 10 Juñu 2024 (TATOLI) – Ministra Edukasaun, Dulce de Jesus, orienta diretór eskola sira envolve alunu sira iha ekipa jestaun ba risku dezastre naturál iha munisípiu, nune’e sira mós bele salva komunidade bainhira akontese situasaun emerjénsia.
“Eskola presiza forma ekipa hodi serbisu hamutuk ho ekipa munisípiu. Bainhira akontese dezastre naturál sira mós hamutuk ho ekipa munisípiu hodi ajuda ita-nia komunidade ne’ebé sai vítima ba dezastre naturál”, Dulce de Jesus reitera bainhira vizita Eskola Sekundária Jerál Públiku Suai, ohin.
Governante ne’e dehan alunu sira ne’ebé hakarak envolve iha ekipa jestaun risku ne’e presiza rejista naran, nune’e konvida Ministériu Solidariedade Sosiál no Inkluzaun (MSSI) no Bombeiru atu disponibiliza formasaun kona-ba salva komunidade bainhira iha situasaun dezastre naturál.
“Crus Vermelha Timor-Leste (CVTL), favór envolve ami-nia estudante. Ita la hein dezastre atu mai tan, maibé ami komesa aprende no preparadu ona atu salva ami-nia aan no komunidade iha situasaun dezastre naturál, tanba Eskola Sekundária Jerál Públiku Suai, eskola ne’ebé sai pioneiru iha Covalima”, ministra husu.
Hatán ba orientasaun ne’e, Diretór Eskola Sekundária Jerál Públiku Suai, Fernando Ferreira, prontu atu kumpre saida mak Ministra Edukasaun dehan hodi envolve estudante iha ekipa jestaun risku nian, nune’e alunu mós bele salva komunidade bainhira mosu katástrofe.
Dirijente ne’e salienta katak eskola sei koopera ho instituisaun sira ne’ebé presiza sira-nia tulun hodi ajuda komunidade iha situasaun emerjénsia.
Bazeia ba orientasaun husi Ministra Edukasaun maka iha tempu badak eskola sei koordena ho Diretór Servisu Munisipál Jestaun Risku ba Dezastre Naturál, Cruz Vermelha Timor-Leste no Autoridade Protesaun Sivíl atu forma alunu sira kona-ba oinsá tulun ema iha situasaun emerjénsia.
Tuir dadus, totál alunu iha Eskola Sekundária Jerál Públiku Suai hamutuk 2.351 ho nia profesór hamutuk 64.
Notísia relevante: Ministra Edukasaun no Solidariedade haree besik situasaun vítima inundasaun iha Suai
Jornalista: Celestina Teles
Editora: Maria Auxiliadora
