iklan

EDUKASAUN, COVALIMA

Mota Huu Netel sobu muru protesaun EBC Tashilin

Mota Huu Netel sobu muru protesaun EBC Tashilin

Mota Huu Netel sobu muru protesaun EBC Tashilin. Foto/Celestina Teles.

COVALIMA, 10 Juñu 2024 (TATOLI) – Udan-boot ne’ebé akontese iha Covalima halo volume mota Huu Netel sa’e hodi sobu muru protesaun iha Eskola Bázika Sentrál (EBC) Tashilin, iha postu Zumalai, munisípiu Covalima.

Diretór EBC Tashilin, Agostinho Freitas, relata katak eskola submete  proposta iha 2023 ba Programa Nasionál Dezenvolvimentu Suku (PNDS) hodi harii muru no, iha 2024, PNDS halo ona konstrusaun, maibé tanba udan ne’ebé tau danifika fali obra ne’e.

“Udan ne’ebé tau iha Covalima halo volume bee mota Huu Netel lori sedimentasaun no ai boot sira taka ponte ne’ebé konstrui husi Ministériu Obra Públika no bee halai ba estada laran hodi fó impaktu halo muru protesaun ne’ebé foin halo ne’e monu”, dirijente eskola ne’e dehan.

Konstrusaun muru protesaun ne’e PNDS finaliza ona no halo ona pagamentu ba traballadór sira no hein atu halo inauguarasaun, maibé seidauk to’o tempu monu ona.

Diretór PNDS Covalima, Pedro de Araújo Gomes, klarifika katak muru protesaun EBC Tashilin monu la’ós tanba obra mak laiha kualidade, maibé tanba impaktu husi dezastre naturál.

“Tanba Ministériu Obra Públiku konstrui ponte ki’ik no bainhira iha tempu udan labele akumula bee no bee lori ai hodi halo mota intupidu, nune’e halo muru eskola monu”, nia esplika.

PNDS implementa programa hodi konstrui muru protesaun bazeia ba planta no kadernu enkargu (BoQ) ho metru 430. Muru ne’e konstrui iha Fevereiru 2024 ne’ebé mai husi Orsamentu Jerál Estadu 2023 hamutuk $52.252,16, husi montante ne’e gasta ona $41.516 no balansu iha $10.738,16.

“Atu buka solusaun, ami presiza halo enkontru ho komunidade, xefe suku no Servisu Edukasaun Covalima no inan-aman hodi halo konstribuisaun, nune’e bele harii fali muru ne’e”, nia adianta.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!